Vera Drake
Gwraig gyffredin mewn byd cymhleth
Y sêr
Imelda Staunton, Phil Davis, Daniel Mays, Alex Kelly, Eddie Marsan, Peter Wight
Cyfarwyddwr
Mike Leigh
Sgrifennu
Mike Leigh
Hyd
125 munud
Sut ffilm
Ffilm a enillodd wobr Bafta y cyfarwyddwr gorau, 2005, i Mike Leigh, a gwobr yr actores orau i Imelda Staunton am ei phortread o wraig gyffredin a'i gwasanaeth erthylu-stryd-gefn yn Llundain yn y pumdegau.
Y stori
Gyda phaneidiau di-ri o de a'i môr deimladrwydd mae Vera Drake (Staunton) yn cynnig erthyliad i ferched ifanc y pumdegau 'sydd mewn trwbwl' cyn pasio'r Ddeddf Erthylu.
Yn wraig a mam gyffredin mae'n gannwyll llygaid ei gŵr Stan (Phil Davis) a'i phlant, Sid (Daniel Mays) ac Ethel (Alex Kelly).
Nid erthylwraig stryd gefn arferol mo hon, fodd bynnag, gan nad yw'n codi tâl am ei gwaith ac ni wŷr ei theulu ddim am y rhan hon o'i bywyd nes i erthyliad fynd o chwith a'r heddlu yn camu i mewn.
Y canlyniad
Ffilm orau Mike Leigh hyd yn hyn. Dywedodd nad oedd yn fwriad ganddo gymryd ochr ar fater erthyliad ond ysgogi trafodaeth ar rywbeth sy'n parhau yn ddadleuol er gwaethaf ei gyfreithloni.
Mae'r cychwyn braidd yn araf a pherthyn rhywfaint o naifrwydd i'r syniad o bobl gyffredin = da, pobl ddosbarth canol = drwg ond mae'n amhosib peidio a chael eich hudo gan berfformiad Staunton.
Perfformiadau
Pinacl gyrfa Staunton gyda Phil Davies mor ddibynadwy ag arfer.
Canolbwynt y ffilm yw dryswch Drake, ddiniwed a syml, yn cael ei dal gan amgylchiadau sydd y tu draw i'w hamgyffred.
Gystal â'r trelar?
Heb weld un.
Yr ymateb
Nid ffilm sydd at ddant pawb a bu rhai'n cwyno fod Vera Drake yn ormod o santes a bod y cymeriadau 'dosbarth canol' yn swnio fel pe byddent yn cymryd rhan mewn drama Noel Coward.
Ond mae'r beirniaid i gyd o'r farn fod hon yn ffilm gwerth ei gweld.
 |
Ychwanegwch eich sylwadau i'r dudalen fan hyn:
|
|
 |
|
|
