91Èȱ¬

The Only Clown in the Village
All Our Sons - Fallen Heroes of 9/11

Adolygiad gan Gwyn Griffiths
Dwy ffilm ar ddau drychineb, ond yn cymryd golwg wahanol iawn ar y trychinebau hynny, yw The Only Clown in the Village aa All Our Sons - Fallen Heroes of 9/11 a ddangoswyd ddydd Llun, Gorffennaf 25, yng Ngŵyl Ffilm Ryngwladol Cymru Ddu yng Nghaerdydd.

Yr unig glown
Kingsley Perera yw'r unig glown o dras Asiaidd cofrestredig ym Mhrydain.

Ganwyd a magwyd ei rieni yn Colombo, Sri Lanka, cyn dod i fyw yn Abertawe yn y Pumdegau ac mae acen Gymreig Kingsley'n yn gryf a phendant.

Pan glywodd Kingsley am drychineb y tsunami ddydd Gŵyl San Steffan, paciodd ei fag a'i offer a throi am wlad ei dadau.
Gweithred ryfedd ar yr olwg gyntaf.

Ond y funud y cyrhaeddodd arfordir dwyreiniol yr ynys gwisgodd ei ddillad clown amryliw a dechrau perfformio mewn ysbytai, ysgolion heb-do a chartrefi plant amddifad heb welyau.

Ymwelodd ag ysgol yn ardal y Tamils, sydd wedi bod yn rhyfela yn erbyn llywodraeth yr ynys mewn brwydr am hunanlywodraeth.

Gwên a llawenydd
Daeth a gwên a llawenydd i wynebau plant ac oedolion a gollodd deuluoedd a chyfeillion a chartrefi yn y trychineb.

Yn ogystal â difyrru'r plant ac ymweld â pherthnasau, bu'n sgwrsio gyda gwirfoddolwyr, amryw ohonynt o wledydd Llychlyn, a chydag oedolion anhapus â'r arafwch i gael pethau'n ôl i ryw fath o drefn.

Mae'r ffilm, a wnaed gan gwmni Undercurrents ar gyfer Community Channel Sky, yn gymysgedd o drueni a dinistr ar ynys ryfeddol ei harddwch naturiol.

Ac yng nghanol y cyfan mae Kingsley, ei acenion Cymreig a'i gampau'n cynnau ennyd o lawenydd yn wynebau rhai sy'n llusgo byw drwy'r dinistr.

Profiadau 9/11
Yng nghanol cyflafan Medi 11, 2001, bu farw nifer fechan o ddynion tân croenddu Efrog Newydd.

Yn All Our Sons - Fallen Heroes of 9/11, ffilm ddogfen a gynhyrchwyd gan Lightwave Pictures ar gyfer Sianel Deledu Gwasanaeth Cyhoeddus yr Unol Daleithiau, mae perthnasau'r rhai a fu farw yn rhannu'u hatgofion a'r hyn a wyddant am brofiadau'r gwÅ·r a gollwyd.

Bychan oedd eu nifer oherwydd gwasanaeth tân Efrog Newydd yw'r lleiaf amrywiol o ran hil o holl weithlu'r ddinas.

Mewn dinas lle mae hanner y boblogaeth yn ddu neu ethnig, mae 93 y cant o ddynion a merched y gwasanaeth tân yn wyn.

Brwydro'n galed
Yr oedd y dynion fu farw wedi gorfod brwydro'n anarferol o galed i gael eu derbyn i'r gwasanaeth ac, yn amlwg, wedi dioddef llawer o wawd eu cydweithwyr croenwyn yn ystod eu gyrfaoedd.

Roedd hynny'n ychwanegu at chwerwder y golled.

Dro ar ôl tro clywsom am rieni yn sôn am falchder eu bechgyn o fod yn gweithio yn y gwasanaeth tân, yn cofio plant na fynnent ddim byd mewn bywyd ond bod yn ddynion tân.

A'u balchder o wybod am ddewrder eu bechgyn.

Stori ac atgofion cyffredin - nes iddynt gael ei dal yn nhrychineb Canolfan Masnach y Byd.

Mwy am Å´yl Ffilm Cymru Ddu 2005

Ychwanegwch eich sylwadau i'r dudalen fan hyn: Enw a lleoliad: Sylw: Mae'r 91Èȱ¬ yn cadw'r hawl i ddewis a golygu sylwadau. Darllenwch sut i wneud y siwr caiff eich sylwadau eu cyhoeddi. I anfon cyfraniad mwy, cysylltwch â ni.