91Èȱ¬

The Assassination of Jesse James
Adolygiad gan Shaun Ablett o 'The Assassination of Jesse James By The Coward Robert Ford' (2007)

Y Sêr:
Brad Pitt, Casey Affleck, Sam Rockwell, Paul Schneider, Garret Dillahunt

Cyfarwyddo:
Andrew Dominik

Sgrifennu:
Andrew Dominik

Hyd:
160 munud

Anaml y byddaf i'n mynd i weld ffilmiau cowboi.
A minnau heb fy ngeni pan oedd ffilmiau John Wayne a'i debyg yn enwog dros y byd dydw i ddim wedi medru gwerthfawrogi y math yna o ffilmiau - a phan glywais taw Brad Pitt oedd yn chwarae'r prif gymeriad yn y ffilm hon nid oeddwn yn sicr a oeddwm am fynd i'w gweld.

Ond wedi clywed llawer o bethau da amdani - gan gynnwys perfformiad Pitt - penderfynias gael blas o rywbeth gwahanol.

Yr oeddwn yn fud yn dod allan o'r sinema; yn methu credu pa mor ardderchog oedd y ffilm.

Er yn canolbwyntio ar ddyddiau olaf Jesse James (Brad Pitt) cawn weld pa fath o bethau wnaeth e yn ei orffennol gan gynnwys cymryd rhan mewn lladrad trên.

Wrth feddwl am y camgymeriadau yn ei fywyd, mae James yn sylweddoli sut mae'r byd yn newid yn gyflym fel na fydd lle i ddynion fel ef cyn bo hir.

Mewn ffordd ryfedd iawn, mae James yn gwybod nad yw'n mynd i fyw yn ddigon hir i gael gweld sut mae'r byd yn mynd i fod.

Mae Brad Pitt yn chwarae rhan arbennig wrth bortreadu problemau'r cymeriad yma ac i raddau gallwn ninnau uniaethu ag ef.

Gwelwn effaith ei bryderon arno wrth iddo droi yn ddyn heb bwrpas ac heb wybod beth i'w wneud â'i fywyd.

Y cymeriad pwysig arall yn y ffilm yma yw Robert Ford (Casey Affleck), y dyn sy'n lladd James. Datguddir y berthynas rhwng y ddau.
Ac o'r holl bobl yn y byd, Ford yw ei ffrind gorau a'r un na fyddai James byth wedi ei ddychmygu yn ei ladd e.

Mae Casey Affleck yn darlunio Ford fel dyn gyda rhyw fath o obsesiwn am James. Ei ddymuniad yw bod fel ef.

Hyd yn oed ar ddiwedd y ffilm nid yw'n gwbl glir pam y dewisodd ladd James.

Mae'r cyfarwyddwr Andrew Dominik wedi llwyddo i greu golygfeydd sy'n cyfleu emosiynau'r cymeriadau trwy gydol y ffilm.

Yn ffilm ag iddi elfennau o ffilmiau'r Pumdegau mae iddi hefyd naws fodern.

Yn canolbwyntio ar y stori a'r cymeriadau yn fwy na chyffro a thechnegau mae'n sicr yn ffilm i'w gwylio - hyd yn oed os nad ydych wedi mwynhau ffilmiau eraill Brad Pitt rhyw lawer - fel fi.