91Èȱ¬

St Trinian's (2008)
Fel yr oedd nid yw eto





Y sêr
Rupert Everett, Colin Firth, Russell Brand, Gemma Arterton, Talulah Riley

Cyfarwyddo
Oliver Parker, Barnaby Thompson

Sgrifennu
Piers Ashworth, Nick Moorcroft ar sail lluniau a llyfrau Ronald Searle.

Hyd
101 munud

Sut ffilm
Ymgais i ddod a stori ysgol ferched fwyaf gwallgof ac anhydrin Lloegr i sylw cenhedlaeth newydd o fynychwyr sinema.

Y cefndir
Mae i gartwnau, straeon a ffilmiau St Trinian's ddalen go helaeth yn llyfr hanes hiwmor Saesneg.

Yr athrylith y tu ôl i'r diafoliaid mewn jimslips ydi Ronald Searle ac ymddangosodd y cartŵn cyntaf yng nghylchgrawnLilliput fis Gorffennaf 1941.

Darluniai ddwy ferch ysgol mewn jimslips rhy gwta yn darllen arwydd a ddywedai: "Owing to the international situation, the match with St Trinian's has been postponed."

Ac yntau'n aelod o'r lluoedd arfog ar y pryd ac yn aros yn Kirkcudbright, Yr Alban; gwnaeth Searle y llun er difyrrwch ffrindiau yr oedd dwy o'u merched yn mynychu Academy for Young Ladies yng Nghaeredin o'r enw St Trinnean's.

Aeth y llun i lawr mor dda fe'i hanfonodd yn syth at Lilliput ond yr oedd Searle mâs yn y Dwyrain Pell pan welodd y defnydd o'i lun gyntaf pan ddaeth o hyd i gopi o'r cylchgrawn ymhlith sbwriel y stryd yn Singapore!

Chlywodd neb ddim oddi wrtho am ddwy flynedd wedyn; tan fis Rhagfyr 1943 ac yntau wedi bod yn garcharor rhyfel.

Ac yn ystod y cyfnod hwn bu'n darlunio'n gyfrinachol gyflwr ef a'i gyd garcharorion gan guddio'r lluniau rhag y Siapaneaid dan fatresi cleifion yn dioddef o'r Clefyd Melyn.

Wedi'r rhyfel cyhoeddwyd y lluniau hyn mewn llyfr a sgrifennwyd gan garcharor arall, Russell Brandon.

Pan ddaeth heddwch ail afaelodd Searle yn y lluniau o ferched anystywallt ysgol breifat - y cyntaf yn darlunio prifathrawes yn holi'r ysgol; "Hand up the girl who burnt down the West wing last night"

A dyna gychwyn pennod ryfeddol o luniau am ferched gwyllt yn llowcio Gin, smocio a bygwth a dychryn pawb o fewn cyrraedd iddyn nhw.

Bu'r cyfan yn llwyddiant ysgubol gan sbarduno Frank Launder i wneud ffilm amdanynt, The Belles of St Trinian's yn 1954.

Fe'i dilynwyd gan Blue Murder at St Trinian's ('57), The Pure Hell of St Trinian's ('60) a The Great St Trinian's Train Robbery ('66)

Un o nodweddion y ffilmiau hyn oedd mai dyn, yn nhraddodiad y pantomeim, chwaraeai ran y brifathrawes, Millicent Fritton, sef yr anhygoel Alastair Sim a oedd yn chwarae hefyd ei brawd o fwci, Clarence, yn y stori hefyd.

Yn y gyfres hon y daeth actor ifanc o'r enw George Cole i amlygrwydd - yn chwarae rhan Flash Harry flynyddoedd cyn bo sôn o gwbl am Arthur Daley a ddaeth a Cole i gymaint o boblogrwydd ar y teledu yn yr Wythdegau.

Un peth a wnâi'r ffilmiau yn wahanol i gartwnau gwreiddiol Searle oedd i'r ffilmiau ychwanegu at ferched gwyllt Dosbarth Pedwar Searle ferched aeddfetach y Chweched yn ymffrostio'n bowld ac yn dalog yn eu rhywioldeb.

Yng ngwaith gwreiddiol Searle doedd dim rhyw o gwbl ond yn amlwg y teimlad oedd fod ei angen ar gyfer y sinema ac fe weithiodd i'r dim os yw poblogrwydd y ffilmiau yn ffon fesur.

Cadwyd at nifer o'r elfennau hyn yn ffilm 2007 gan gynnwys Mrs Fritton yn cael ei hactio gan ddyn sydd hefyd a rhan wrywaidd arall yn y ffilm.

Russell Brand ydi Flash Harry erbyn ond rhyw gysgod digon egwan yw e o George Cole.

Y stori
Fel y bu erioedy mae'n parhau; mae St Trinian's mewn trafferthion. Mrs Fritton (Rupert Everett) heb arian i dalu ei dyledion a'r Gweinidog Addysg yn y Llywodraeth, Geoffrey Thwaites (Colin Firth) yn benderfynol ar gau'r sefydliad.

Er mwyn ennill arian i adfer y lle rhoddir cynllun ar waith i ddwyn llun gwerthfawr o'r Amgueddfa Genedlaethol gyda chymorth Flash Harry (Russell Brand).

Wrth gwrs, rhaid wrth ferch newydd i ymuno â'r ysgol i'w chamdrin (Talulah Riley) nes ei bod yn ennill ei phlwyf a gwneud argraff ar y Brif Eneth, Kelly (Gemma Arterton).

Y canlyniad
Er gwaethaf ambell i ymdrech i ddiweddaru'r stori gyda chyfeiriadau at smocio baco gwirion yn hytrach na baco mwg ac at gyffuriau dydi'r pethau oedd yn gwneud St Trinian's yn feiddgar ddyddiau ei ieuenctid ddim yn mynd i gyffroi neb erbyn heddiw.

A chyda stori wan a chymeriadau sy'n creu fawr ddim argraff ffilm yw hon sydd ond o ddiddordeb i'r genhedlaeth honno sydd am ei chymharu a'r aflendid godidog a fu yr holl flynyddoedd yna yn ôl pan oedd cynulleidfaoedd yn ddiniweitiach a'r gwylliaid ar y sgrin o'r herwydd yn fwy beiddgar..

Ac mae'n od gorfod dweud fod ffilmiau du a gwyn y Pumdegau yn llawer mwy lliwgar na hon.

Perfformiadau

Adolygiad arall