91Èȱ¬

Harry Potter and The Order of the Phoenix (2007)
Adolygiad gan Shaun Ablett

Y Sêr
Daniel Radcliffe, Emma Watson, Rupert Grint, Imelda Staunton, Gary Oldman

Cyfarwyddo:
David Yates

Sgrifennu:
Michael Goldenberg

Hyd:
133 munud

Dyma'r bumed ffilm a seiliwyd ar lyfrau J.K.Rowling ac mae'n teimlo fel adeg hir iawn er pan ddaeth y llyfrau allan, ac wedyn y ffilm gyntaf.

Er i bob ffilm gael ymateb gwahanol gan wahanol bobl, maen nhw, yn fy marn i, yn dal yn gryf gyda llawer o bethau gwahanol ac arbennig iawn ynddynt.

Ar ddechrau'r ffilm hon ymosodir ar Harry (Daniel Radcliffe) a Dudley (Harry Melling) gan y Dementors gan orfodi Harry i ddefnyddio ei wialen hud i'w rhwystro yn groes i reolau y Minsitry of Magic.

Ar ôl hala'r haf ar ben ei hunan, heb glywed gan ei ffrindiau, anfonir Harry i leoliad diogel, tŷ Sirius Black (Gary Oldman).

Sefydlwyd rhyw fath o gymdeithas gan Albus Dumbledore (Michael Gambon), yr Order of the Phoenix i gael gwared â Lord Voldemort (Ralph Finnes) unwaith ac am byth. Mae aelodau'r gymdeithas hon yn cynnwys Dumbledore, Ron Weasley (Rupert Grint) a'i deulu, Sirius Black, Mad Eye Moody (Brendan Gleeson) ac eraill.

Mae nifer o gymeriadau newydd fel Luna Lovegood (Evanna Lynah) a Dolores Umbridge (Imelda Staunton) yn y ffilm.

Gydol y ffilm, nid oes neb o fyd dewiniaeth yn fodlon credu bod Lord Voldemort nôl.

Mae Dumbledore yn cael ei wahardd o Hogwarts a Dolores Umbridge yn Bennaeth newydd ac o dan ei rheolaeth hi, mae'r rheolau yn newid, a chyn bo hir nid oes rhyddid o gwbl i'r disgyblion.

Felly, gyda help Ron a Hermione (Emma Watson), mae Harry yn creu 'byddin' i helpu'r disgyblion ddefnyddio hud i amddiffyn eu hunan gan ei fod yn sicr erbyn hyn bod Voldemort yn ôl.

Cawn ddiweddglo trist ofnadwy, gyda Sirius yn marw pan fo Harry, ei ffrindiau ac aelodau eraill o'r Order of the Phoenix yn ymladd Lord Voldemort a'i ddewiniaid.

Nid dyma ffilm orau y gyfres a hithau heb lawer o gyffro cyn y diwedd - ond mae'r frwydr rhwng Dumbledore a Voldemort yn ardderchog.

Fel arfer, mae Daniel Radcliffe yn dda fel Harry a Rupert Grint ac Emma Watson fel Ron a Hermione.

Credaf mai Gary Oldman fel Sirius Black a roddodd y perfformiad gorau gan ei fod yn gymeriad diddorol a rhyfedd iawn.
O'r herwydd, yr oeddwn yn drist iawn pan gafodd ei ladd.

Os ydych wedi mwynhau'r ffilmiau Harry Potter eraill ewch i weld hon gan ei bod yn profi unwaith yn rhagor pam mae'r ffilmiau hyn a'r llyfrau gwreiddiol mor boblogaidd dros y byd.

Adolygiad arall