The Incredibles
Teulu cyffredin anghyffredin
 
Y sêr
Holly Hunter, Craig T Nelson, Samuel L Jackson, Jason Lee, Spencer Fox, Sarah Vowell
Cyfarwyddwr
Brad Bird
Sgrifennu
Brad Bird
Hyd
120 munud
Sut ffilm
Cartwn i hen do o fynychwyr sinema - animeiddiad i'r genhedlaeth newydd - am deulu wedi'i donio a galluoedd arbennig yn null Superman, Spider Man ac yn y blaen.
Mae'n cael ei disgrifio fel ffilm addas i'r teulu i gyd gyda doniolwch a chyffro yn gymysg a jôcs i oedolion.
Y stori
Yn dilyn gwaharddiad cenedlaethol ar arwyr cudd rhaid i Mr Incredible (llais Craig T Nelson) a'i briod, Elastigirl (Holly Hunter), fyw bywyd cyffredin fel Bob a Helen Parr gyda'u dau o blant (Spencer Fox a Sarah Vowell) fyw bywyd cyffredin gyda Bob yn rhygnu o ddydd i ddydd yn pwyso a mesur ceisiadau mewn swyddfa yswiriant.
Fodd bynnag, gorfodir Bob i arddel ei ddoniau unwaith eto wrth i seicotig o'r enw Syndrome (Jason Lee) fygwth cyfraith a threfn.
Buan iawn y daw'r ymdrech yn un deuluol gyda Mam a Dad yn dibynnu ar gymorth Dash y mab sy'n rhedwr tu hwnt o gyflym a Violet eu merch sy'n gallu troi'n anweledig.
Y darnau gorau
Mae yna gymaint ohonyn nhw:
Bob wedi'i wasgu mewn i'w gar.
Y ffraeo teuluaidd o gwmpas y bwrdd.
Erlid Dash ar ynys Syndrome.
Pob golygfa gydag Edna gynlluwraig dillad - yn enwedig yr un lle mae'n egluro pam na ddylai archarwyr wisgo mantell!
Ac ati ac ati ac ati
Perfformiadau
Mae Nelson yn wych fel yr arwr tawel sy'n rhy fawr i'w ddesg yn ei swyddfa ac i'w gar sy'n ei gludo i'w waith.
Ond mewn perfformiad cwbl dros ben llestri mae Brad Bird yntau yn gwbl wefreiddiol fel y dylunwraig dillad arwyr, Edna Mode ffasgaidd ei thueddiadau.
Gystal â'r trelar?
Yn well byth.
Ambell i farn
Croeso cyffredinol.
Y canlyniad
Ffraethineb, dychan a chyffro sy'n llwyddiant ysgubol.
Ond mae mwy yn y ffilm hon i oedolion nag i blant. Yn wir, mae'n bosib y bydd y rhai ieuengaf yn blino ar yr hanner cyntaf gyda'i jôcs oedolion ond bydd yr ail hanner yn mynd â gwynt pawb yn ddiwahân.
Y cyfuniad o'r ymfflamychol a'r cwbl gyffredin yn wych.
Tra bo pawb yn meddwl mai Shark Tale fyddai ffilm gartŵn yr hydref 'ma mae honno'n fwy o siom fyth ers dyfodiad yr Incredibles
Geiriau i'w cofio
"Waeth faint o weithiau rydych chi'n achub y byd mae'n cael ei hun mewn strach unwaith eto. Rydw i'n teimlo fel dynas llnau. 'Dwi newydd dwtio'r lle ma. Allwch chi ddim i gadw fo'n dwt am ddeng munud?'" cwyna Mr Incredible.
Elastigirl: Mae pawb yn sbesial Dash.
Dash: Sydd yr un peth a dweud nad yw neb yn sbesial.
"Fydda i byth yn edrych yn ôl cariad. Mae'n tynnu dy sylw oddi ar y nawr," meddai Edna.
"Yda ni wedi cyrraedd, byth?" meddai'r plant ar eu ffordd i achub y byd!
Gwerth mynd i'w gweld
Byddai'n bechod peidio. Trît Dolig heb ei ail.
 |
Ychwanegwch eich sylwadau i'r dudalen fan hyn:
|
|
 |
|
|
