Mae'r ysgol yn newydd sbon gyda phob cyfleusterau modern ynddi ac yn adeilad golau ac ysgafn gydag awyrgylch gartrefol braf drwyddi draw.Yn wir eglurodd Bryn Terfel mai dyma'r ysgol yr hoffai ef fod wedi ei mynychu pan yn blentyn. Eglurodd bod yr ysgol newydd yn enghraifft ddelfrydol sut y dylai pob ysgol fod y dyddiau hyn. Eglurodd Pennaeth yr ysgol, Mr Ken Hughes, fod y plant yn ysu i weld Bryn ers tua deg o'r gloch y bore ac na chafodd neb llai na Siôn Corn yntau y fath sylw gan y plant. Diolchodd Mr Hughes i Bryn am roi o'i amser prin i ddod i Borthmadog i agor yr ysgol yn swyddogol. Daeth nifer o wahoddedigion ynghyd i'r ysgol a chafwyd anerchiad gan Gadeirydd Cyngor Gwynedd, sef y Cynghorydd R H Wyn Williams.
 |
Ìý
