|
Gwelwyd y ceiliog ar 28 Mawrth ac roedd yr iâr wedi dychwelyd erbyn 4 Ebrill, wythnos union ar ôl y ceiliog. Roedd hi'n ga1onogol gweld bod y ceiliog wedi derbyn y nyth newydd yn ddigwestiwn, er ei fod yn edrych yn amheus arno ar y diwrnod cyntaf. Fel y gŵyr pawb bellach bu i nyth llynedd gwympo yn ystod tywydd garw ddiwedd mis Mehefin ac yn anffodus lladdwyd y ddau gyw ifanc. Er mwyn sicrhau nad oedd yr un peth yn digwydd eleni, torrwyd copa'r goeden i 1awr gan ail-greu'r nyth yn y brigau saffach yn is i lawr. Bu plant Ysgol Llanfrothen yn cynorthwyo gyda'r gwaith pwysig o gasglu brigau i'r nyth newydd. Mae'r ceiliog wedi bod yn brysur iawn yn cario brigau a mwsog a gwair i'r nyth newydd. Ef hefyd sydd yn gyfrifol am ddal pysgod iddo'i hun ac i'r iâr. Mae ganddo ddyletswyddau eraill i'w cyflawni wrth gwrs er mwyn gwneud yn siŵr y bydd cywion eto eleni. Bu'n brysur hefyd yn hel adar ysglyfaethus eraill a brain o safle'r nyth. Does dim syndod bod golwg flinedig arno! Digon diog yw'r iâr ar y funud yn eistedd am gyfnodau hir yn gwneud dim. Ond dyna ferchaid i chi!! Mawr obeithiwn y bydd wyau yn y nyth yn ystod yr wythnosau nesaf. Bydd yr iâr yn gori am oddeutu 37 diwrnod cyn i'r wyau ddeor. Yna bydd y cywion yn y nyth am dros hanner cant arall i ddyddiau. Pob lwc iddynt. Mi fydd cyfleusterau yr RSPB eto ger Pont Croesor eleni, o 29 Ebrill ymlaen. Yn wahanol i'r llynedd bydd cuddfan a chanolfan yno gyda theledu mawr yn darlledu lluniau byw o'r nyth. Bydd telesgobau yno hefyd ac arbenigwyr wrth law i ateb eich ymholiadau. Buaswn yn annog pobl unwaith eto i ddefnyddio'r safle yma i wylio'r adar. Peidiwch â mynd yn agosach i'r nyth os yn bosibl, gan y gall y pâr adael safle'r nyth os oes gormod o aflonyddu arnynt. Dyna'r peth ola' yr ydym ei angen. Beth am alw draw i Bont Croesor yn ystod yr wythnosau nesaf i fwynhau'r olygfa arbennig yma sydd wedi dod â chymaint o enwogrwydd i dalgylch Yr Wylan. Gallwn sicrhau na fyddwch wedi eich siomi. Elfyn Lewis
 |
Ìý
