91Èȱ¬

Y maent yn gwneud gwaith ymchwil i'r amgylchiadau a'r tywydd sydd yn wynebu llongau'r gofod wrth lansio a theithio i'r gwagle.

Cyfrifoldeb Alexi yw ymchwilio i dywydd yr uchelderau.

Bob yn hyn a hyn y mae'r haul yn fflachio a thaflu allan gymylau o electronau sydd yn creu ystormydd magnetig. Gallai'r rhain greu ymbelydredd allai ddifrodi lloerennau dynol a llongau yn y gofod.

Y mae Alexi yn ceisio deall sut y mae'r newidiadau i'r haul yn effeithio ar y systemau a gynlluniwyd i deithio a gweithio yn y gofod. Rhaid dyfeisio trefn gymhleth i amddiffyn llongau'r gwagle a'r lloerennau.

Alexi oedd Cadeirydd Pwyllgor y 5ed Cynhadledd Tywydd Ewropeaidd a gynhaliwyd ym Mrwsel ym mis Tachwedd. Darlithiwyd yno gan yr astronot Christer Fugelang o Houston fydd yn teithio i'r gofod eleni. Dyma lun o Alexi ac yntau yn y cyfarfod i'w groesawu.

Roedd Alexi yn un o'r 10,000 a ystyriwyd i fod yn astronot a chyrhaeddodd y 192 ymgeisydd dethol. Yn anffodus ni chafodd ei dewis i'r rhestr fer olaf un ond mwynhaodd y profiad unigryw a chyfarfod pobl mor arbennig a diddorol.

Merch Les a Christine Glover, Pen Lon Celyn, Morfa yw Alexi. Addysgwyd hi yn Ysgolion Eifion Wyn ac Eifionydd ac yna graddiodd gyda MSc dosbarth cyntaf ym Mhrifysgol Llundain. Cafodd Ddoethuriaeth (PhD) am ei gwaith ymchwil ar Ffiseg yr Haul a'r Gofod gan gynnwys yr holl ferw crasboeth sydd yn digwydd o gwmpas yr haul.

Hyfryd oedd gweld bod ei CV yn datgan ei bod yn rhugl mewn Cymraeg yn ogystal a Ffrangeg.

Buasai'r bardd, y crwydryn a'r gwyddonydd Dr T.H. Parry-Williams yn falch iawn o gyn-ddisgybl ei hen ysgol.

Pob dymuniad da i Alexi yn ei gwaith arloesol. M.L.