91Èȱ¬

Fe sicrhaodd Port ddyrchafiad i Brif Gynghrair Cymru y tymor nesaf, os bydd y newidiadau a ddisgwylir gan awdurdodau'r Gynghrair honno wedi eu cwblhau erbyn eu hymweliad â'r Traeth ar Fai'r 14eg.

Mae'r swyddogion a chefnogwyr wrthi fel lladd nadroedd y dyddiau yma i sicrhau y bydd popeth yn ei le erbyn y diwrnod hwnnw, ac maent yn gwbl ffyddiog y gwireddir y freuddwyd o weld y Clwb yn dychwelyd i'r Brif Gynghrair ar ôl absenoldeb o bedair blynedd. Nid oes amheuaeth nad ydyw eu dycnwch a'u brwdfrydedd yn haeddu hynny.

Ychydig ddyddiau cyn y gêm ym Mwcle cafwyd canlyniad boddhaol i'r gwrandawiad yn Llandudno i achos y golwr, Richard Harvey. Mae pawb sydd yn gysylltiedig â'r Clwb, yn arbennig felly y chwaraewyr, Viv Williams y rheolwr ac Osian Roberts yr hyfforddwr, i'w canmol am gario ymlaen i sicrhau tymor mor llwyddiannus, a'r bygythiad yma fel rhyw gwmwl du uwch eu pennau am gyfnod rhy hir o lawer.

Er iddynt ennill y Bencampwriaeth, nid dyma ddiwedd y tymor o bell ffordd, gan fod Port yn Rownd Derfynol Cwpan Her yr Arfordir yn erbyn Llandudno ar Fai 13, ac yn Rownd Gyn-derfynol Cwpan y Gynghrair yn erbyn yr un gwrthwynebwyr ar ôl sicrhau'r fuddugoliaeth yn erbyn Yr Wyddgrug y Sadwrn diwethaf 3-0.

Byddai ychwanegu dwy Gwpan at eu llwyddiant yn barod yn y Gynghrair yn ddiweddglo teilwng iawn i dymor i'w gofio.

GLJ