91Èȱ¬

Gwelir yno naw o geffylau chwimwth o rywogaeth Sbaenaidd ac Arabaidd a'u marchogion, mewn clogyn a helmed, yn cyflawni campau anhygoel ar garlam gwyllt rhwng deng milltir ar hugain a deugain milltir yr awr.

Dyma Farchogion y Datguddiad - The Horsemen of the Apocalypse, - sy'n enwog am eu gorchestion mewn ffilmiau fel Jason and the Argonauts, Merlin, Sharpe, Sleepy Hollow, Extremely Dangerous, Just Visiting, ac ambell opera sebon fel Emerdale

Maent weithiau'n chwyrlio yn wysg eu hochrau, yn wysg eu cefnau, a'u pennau i waered, ar eu traed, yn trin cleddyfau a hyd yn oed yn marchogaeth drwy fflamau.

Ef oedd pencampwr Paffio Thai drwy Ewrop gyfan yn 1993. Daw rhai o'r marchogion eraill o Ffrainc a'r Is-Almaen. Y mae un-ar-ddeg yn y criw i gyd, pump o farchogion a chwech arall yn paratoi'r maes a gofalu am ddiogelwch ac ati.

Daw'r sioe i Gefn Gwyn yn sgil cyfarfyddiad Ian a Gwen Vaughan Jones merch y fferm, mewn arddangosfa yn Rhydychen. Mae Gwen yn aelod o Gymdeithas Ganoloesol Harlech sy'n teithio ledled Prydain i ail-greu hen weithgareddau fel ymladdfeydd cleddyfau.

Ymdrin â cheffylau yw ei hoff ddiddordeb. O Goleg Amaethyddol Glynllifon aeth i'r Brifysgol ym Mangor ac ennill gradd HND mewn astudiaethau ceffylaidd, cwrs sy'n cynnwys llawer agwedd megis bioleg a geneteg a busnes yn ogystal ag astudiaeth o'r anifeiliaid.

Hoffai Gwen ddiolch yn fawr i bawb a fu'n gefnogol i'r fenter ac a fu'n cynorthwyo mewn amrywiol ffyrdd ac mae Ian a hithau yn ymddiheuro fod y posteri, trwy amryfusedd, wedi eu hargraffu yn Saesneg.

Bydd y sioe gyntaf yng Nghefn Gwyn nos Fercher 28 Mai am chwech o'r gloch a phob nos Fawrth, nos Fercher a nos Iau o hynny ymlaen.