91Èȱ¬

Agorir Oriel Kyffin Williams gan Ardalyddes Ynys Môn ar 18 Gorffennaf.

Fel rhan o'r dathliad mae cerflun arbennig wedi cael ei gynhyrchu gan Michael Scheuermann.

Yn ystod yr wythnos agoriadol cynhelir gweithgareddau celfyddydol fydd yn sicr o apelio i nifer.

Mae llyfr arbennig hefyd wedi ei gynhyrchu i glodfori Oriel Kyffin Williams. Mae'r llyfryn hwn yn llawn lluniau o gasgliad Oriel Ynys Môn sy'n cofnodi pethau sy'n gyfarwydd i ni ond hefyd cawn hen ddelweddau pwysig o'r Ynys hon sydd wedi hen ddiflannu.

Yn ogystal a'r darluniau, mae yma nifer o baentiadau olew sydd ymhlith y gorau a gynhyrchodd Kyffin erioed. Mi fydd y llyfr ar werth yn siop Jac Do Oriel Ynys Môn.

Dywedodd deilydd y portffolio Hamdden, y Cynghorydd Eurfryn Davies, "Bydd Oriel Kyffin Williams yn deyrnged addas i lwyddiannau artistig y gŵr ac yn gartre parhaol i dros 400 o ddarnau o waith. Bydd yr Oriel newydd hefyd yn ased ddiwylliannol unigryw a phwysig yn lleol, rhanbarthol a chenedlaethol."

Rhodd hael

Bu Oriel Ynys Môn yn ffodus iawn o gael Syr Kyffin Williams, oedd yn enedigol o Langefni, fel hyrwyddwr i'r celfyddydau ym Môn a bu'n gefnogwr brwd a gweithgar o waith yr Oriel ers ei hadeiladu yn 1991.

Yn ei haelioni, rhoddodd Syr Kvffin Williams dros 400 o weithiau celf gwreiddiol i Orief Ynys Môn, o sgetys i ddarluniau i waith olew sylweddol.

Mae'r Oriel yn diogelu'r casgliad mawr a phwysig hwn a balchder er budd pobl Môn a'i hymwelwyr.

Rhoddodd Syr Kyffin Williams sêl bendith ar y prosiect uchelgeisiol o sefydlu Oriel Kyffin Williams cyn ei farwolaeth ar 1 Medi 2006.

Sefydlwyd Ymddiriedolaeth yn enw Syr Kyffin Williams er mwyn gwireddu'r prosiect.

Bydd yr Ymddiriedolaeth yn parhau i hyrwyddo gwaith Syr Kyffin Williams mewn sawl maes ac yn annog datblygiad gwaith celf artistiaid ifainc yn benodol.