91Èȱ¬

Pan oeddynt yn byw ar y gororau daethant yn ymwybodol o'r iaith Gymraeg wrth fynd am dro a gweld enwau dieithr ar y ffermydd a deall mai enwau Cymraeg oeddynt.

Ymunodd Rosemary â dosbarth Cymraeg bryd hynny a phan benderfynodd y ddau ddod i Gymru i ymddeol aeth Mike ati hefyd i ddysgu'r iaith.

Felly pan ddaethant i Rowen roeddent yn medru Cymraeg - yn wahanol iawn i Saeson eraill a ddaeth i Rowen i fyw yn ystod y blynyddoedd!

Gan fod Rosemary yn arfer cymryd dosbarthiadau Cymraeg cyn dod i Ddyffryn Conwy roedd yn barod i gynnal dosbarthiadau dysgwyr pan ddaeth i fyw yma.

Mae dyled yr ardal yn fawr iddynt gan iddynt weithio'n ddiflino yn Nyffryn Conwy ac mae lIawer o ddysgwyr yn ddyledus iddynt.

Bu Mike yn Llywodraethwr yn Ysgol Rowen a rhoddodd lawer o'i amser i'r plant a'r ysgol.

Roedd y ddau yn aelodau gwerthfawr o Gymdeithas Treftadaeth Dyffryn Conwy gan weithredu ar y Pwyllgor.

Roeddynt hefyd yn aelodau ffyddlon o Gymdeithas Gruffydd ap Cynan, Conwy, a bu Mike yn Llywydd yn ei dro.

Bu Rosemary yn aelod ffyddlon o Gangen Eigiau o Ferched y Wawr a bu hithau hefyd yn Llywydd ac Ysgrifennydd y Gangen.

Bu Rosemary a Mike yn aelodau brwdfrydig o'r Clwb Garddio yn y pentref ac yr oedd gardd eu cartref yn Rowen yn dystiolaeth o hynny.

Gweithiodd Rosemary yn ddygn hefyd yng nghangen Rowen o Sefydliad y Merched.

Bydd colled fawr i'r Pentan ar ôl Mike.

Bu'n olygydd yn ei dro a byuddai yn gosod y papur a'i blygu bob mis yn ddi-ffael.

Bydd chwith i dîm y gosod yn festri Carmel ar ei ôl.

Bydd gennym lawer o atgofion melys am eu cyfnod yn ein plith ac un o'r uchafbwyntiau oedd gweld Mike yn dod i'r rownd derfynol Dysgwr y Flwyddyn yn Eisteddfod Genedlaethol Bro Ogwr.

Dymuniadau da iddynt yn y dyfodol yn eu hardal newydd, ein colled ni yn Nyffryn Conwty yw eu hennill hwy.