91Èȱ¬

Mae'r Ganolfan, sy'n cynnwys 12 o weithdai crefft, neuadd arddangos a bwyty, eisoes wedi denu nifer o grefftwyr ac arlunwyr lleol, ac yn eu plith mae Llinos Mair o gwmni Celtes.

Hyd yn ddiweddar, cynnig gwasanaeth dylunio ffrilans i gwmnïau dwyieithog yn Sir Gaerfyrddin oedd Llinos Mair, a hynny o'i chartref yn Llangynin.

Creu anrhegion Cymreig
Erbyn hyn mae ganddi gasgliad o anrhegion Cymreig yn seiliedig ar ferched chwedlonol Cymru. Mae'r anrhegion, sy'n cynnwys pot pourri, canhwyllau, cardiau, a dillad, yn rhoi cyfle i eraill ddysgu am y chwedlau ac am gymeriadau fel Arianrhod, Blodeuwedd a Rhiannon - merched arwrol, merched hudolus. merched prydferth.

Mae'n defnyddio dulliau traddodiadol i greu cefndir pob llun. Wedi i hwnnw gael ei sganio mae'r cymeriad yn cael ei ychwanegu yn ddigidol.

Fe wnaeth arddull drawiadol Llinos Mair ddal sylw Mairwen Prys-Jones, Cyfarwyddwr Cyhoeddi, Gwasg Gomer, ac o ganlyniad cyhoeddwyd Celtic Heroines, llyfr sy'n cynnwys deg o ddarluniau Celtes.

Bu'n wythnos brysur ac yn un llwyddiannus iawn i'r cwmni. Mae'r Eisteddfod yn ddigwyddiad pwysig iawn yng nghalendr nifer fawr o gwmnïau Cymreig.

"Mae cwmni fel Celtes yn dibynnu ar siaradwyr Cymraeg i brynu ei nwyddau, felly mae'r 'Steddfod yn fan delfrydol i hyrwyddo'r fusnes a hefyd i werthu," meddai Llinos Mair.

Ffair Nadolig
Os na chawsoch chi gyfle i brofi hud a rhamant y casgliad yn ystod wythnos yr Eisteddfod, beth am alw draw i Neuadd Arddangos Canolfan Grefftau San Clêr rhwng Tachwedd 18fed a Rhagfyr 6ed pan fydd Celtes yn cynnal ei Ffair Nadolig.

Bydd modd siopa rhwng 10.30 a 4.30 o ddydd Mawrth i ddydd Sul. Gyda'r hwyr bydd arddangosiadau amrywiol, megis addurno cacennau a gwneud addurniadau Nadolig yn cael eu trefnu. Bydd cyfle hefyd i ennill gwobrau yn un o gystadlaethau Celtes.

Bydd croeso twymgalon yn eich disgwyl ym mwyty Talents lle mae dewis eang o brydau ysgafn ar y fwydlen, ac mae'r cyfan yn cael eu paratoi gan ddefnyddio'r cynnyrch lleol gorau.