91Èȱ¬

Yn ystod y tair blynedd ar ddeg y bu'n bennaeth, gwelwyd newidiadau mawr yn yr ysgol. Gyda'r galw cynyddol am addysg trwy gyfrwng y Gymraeg, fe agorwyd bloc dysgu cyfrwng Cymraeg a gwelwyd cynnydd sylweddol yn nifer y disgyblion. Adeiladwyd ystafelloedd technoleg newydd ac adnewyddwyd rhannau helaeth o'r hen adeilad yn ogystal. Llwyddwyd i gael cyfleusterau fideo gynadledda o'r radd flaenaf a chafodd yr hen adeilad ei ail doi.

Yn ogystal â gwella ansawdd yr adeiladau, gwelwyd cynnydd mewn safonau addysgiadol hefyd. Enillodd Yr Ysgol wobr Gwella Ysgolion ACCAC am ganlyniadau arholiadau allanol ddwywaith ac eleni, gwelwyd mai Ysgol Caereinion oedd ar y brig trwy Grymru ac ymysg y gorau ym Mhrydain yn y canlyniadau arholiadau Safon Uwch.

Yr oedd Dr Charles yn hynod gefnogol i ddisgyblion, staff a rhieni yr ysgol. Llwyddodd i arwain yr ysgol yn llwyddiannus trwy gyfnodau digon anodd yn sgil toriadau cyllidol blynyddol. Er mai Cemeg oedd ei brif faes dysgu, daeth yn arbenigwr ar ddysgu Technoleg Gwybodaeth yn Ysgol Caereinion ac yr oedd ganddo hefyd ddiddordeb mawr mewn chwarae gitâr, fel y gwelwyd wrth iddo gymryd rhan yn y band mewn cynyrchiadau ysgol yn fynych. Bydd colled mawr ar ei ôl a hoffem ddiolch iddo am ei holl waith, ei gyngor, ei arweiniad a'i gyfeillgarwch dros y blynyddoedd.

Trefnwyd nifer o weithgareddau ar ddiwedd y tymor i ddangos ein gwerthfawrogiad i Dr Charles. Trefnodd y Llywodraethwyr noson gymdeithasol a swper ffarwelio yn Henllan ac fe'i anrhegwyd a diolchwyd iddo ar ran y Llywodraethwyr gan y Cadeirydd, Myfanwy Alexander. Gregynog oedd y lleoliad ar gyfer y cinio staff. Cawsom ginio blasus a noson hwyliog iawn yng nghmwni'r grŵp poblogaidd "Up all Nite" ac ambell eitem gan gôr merched a chôr dynion y staff!

Cafwyd cyngerdd arbennig wedi ei drefnu gan Mrs Heulwen Davies yn y Ganolfan gyda nifer o gyn ddisgyblion a disgyblion presennol yr ysgol yn darparu gwledd o adloniant. Mae rhywun yn rhyfeddu at y doniau disglair hyn ac yr oedd Dr Charles yn amlwg yn teimlo'n reit emosiynol ar y noson. Fe'i anrhegwyd yn y cyngerdd ar ran y Gymdeithas Rhieni ac Athrawon gan Gill Owen a Sally Whalley.

Ar ddiwrnod olaf y tymor, derbyniodd Dr Charles anrheg ar ran y disgyblion gan brif ddisgyblion yr ysgol ac hefyd ar ran y staff. Cafwyd gwasanaeth carolau arbennig iawn i gloi'r flwyddyn yn Eglwys y Santes Fair a diolch i'r Parchedig Chris Webb am ei anerchiad pwrpasol.

Hoffwn ddymuno ymddeoliad hir a dedwydd i Dr Charles a phob dymuniad da iddo ef a Rose ei wraig ar gyfer y dyfodol.

Ac ar drywydd hollol wahanol - mor braf oedd gweld cymaint o bobl ifanc yr ardal ar y teledu yn cymryd rhan ar lwyfan Canolfan y Mileniwm gyda'r Ffermwyr Ifanc. Cyngerdd gwych a phrofiad arbennig iawn dwi'n siŵr - daliwch ati!