91Èȱ¬

Daeth cryn lwyddiant i ran yr Adran yn yr Eisteddfodau Cylch a Sir a bydd yr Uwch Adran nawr yn cynrychioli Rhanbarth Eryri yng Nghystadlaethau Côr, Parti Deulais a Grŵp Llefaru i Adrannau.

Ymfalchïwn hefyd yn llwyddiant nifer o unigolion yr Adran - pob lwc i Casi Wyn, Lara Hughes a Glain Dafydd yn Rhuthun.

Diolch i Jên ac Einion Dafydd am hyfforddi'r Côr a'r Parti, i Carol Llywelyn am gyfeilio, ac i Elfed Williams am hyfforddi'r Grŵp Llefaru.

Mae'r diolch mwyaf yn mynd i'r aelodau am eu holl ymroddiad yn ystod y cyfnod yma - 'da chi'n llwyr haeddu pob llwyddiant a dymuniad da yn Rhuthun. Rydym yn falch iawn ohonoch chi.

Cafwyd cyfle i ymlacio yn dilyn holl brysurdeb yr Eisteddfodau wrth i Miss Ann Hughes, Dirprwy newydd Ysgol Y Garnedd, ddod at y criw nos Iau, 23 Mawrth, i gynnal noson ddawnsio gwerin.

Cafwyd noson hwyliog iawn, a phawb wedi mwynhau yn arw a nifer wedi cael eu siomi ar yr ochr orau. Diolch i Ann am noson mor arbennig.

Bydd y criw nawr yn canolbwyntio ar ymarfer ar gyfer Chwaraeon Cenedlaethol Uwch Adrannau'r Urdd sydd yn cael eu cynnal yn Y Bala ar 20 Mai.

Bydd tîm pêl-rwyd y marched yn amddiffyn eu coron fel Pencampwyr Cymru, a'r tîm pêl-droed yn gobeithio gwneud yn well na'r llynedd!

Rydym yn gobeithio codi nawdd ar gyfer prynu dillad addas ar gyfer y cystadlaethau yma felly byddwn yn ddiolchgar tu hwnt pe bai rhywun yn fodlon noddi'r timau neu yn gwybod am rywun fyddai a diddordeb i noddi.