91Èȱ¬

O edrych nôl ar yr Eisteddfod Ddwl a gynhaliwyd yng Ngwesty Gellifawr ar Dachwedd 7fed, anodd gwybod pwy oedd wedi cael y mwynhad mwyaf allan o'r noson. Ai'r gynulleidfa, y cystadleuwyr, y gyfeilyddes Marilyn Lewis, y wraig wadd Jenny Thomas (gynt o Gellifawr) neu'r beirniad Dewi Pws a'i wraig Rhiannon oedd wedi chwerthin fwyaf tybed? Yr hyn y gellir ei ddweud i sicrwydd yw fod pawb a oedd yno wedi cael mwynhad pur a llawer yn gofyn, "pryd mae'r un nesaf?".

Achlysur a drefnwyd gan Rocesi'r Fro Cwm Gwaun oedd yr eisteddfod ond y ddwy a oedd wedi bod yn bennaf gyfrifol am y trefniadau oedd Katrina Jenkins, yr ysgrifennydd a llywydd y noson, Enfys Howells. Diolchwyd yn ddiffuant i'r ddwy ar ddiwedd y noson gan Anna Williams.

Er mwyn rhoi pawb mewn hwyliau da, dechreuwyd y cystadlaethau trwy ganu 'Pwnc' - rhywbeth nad oedd y beirniad wedi'i glywed erioed o'r blaen. Roedd wedi rhyfeddu at y ddawn ac yn meddwl yn sicr y dylai canu 'Pwnc' fod yn rhan o'r Olympics! Dau barti a fu'n ddigon dewr i daclo'r darn am y Sosban Fach, un o gapel Caersalem a'r llall o gapel Jabes. Caersalem ddaeth i'r brig am eu harmoni a'u hamrywiaeth.

Y dynion oedd yn chwilio am brofiad ddaeth i'r brig yn y 'Parti Canu', gyda'u dehongliad o 'Milgi, Milgi'; y merched o brofiad ddaeth yn ail gyda 'Moliannwn'; a pharti'r plant yn canu 'Dacw Mam yn Dwad' ddaeth yn drydydd.

Wyn Davies, Llandudoch oedd yr unig gystadleuydd ar yr adroddiad digri ac yn llawn deilwng o'r wobr.

Bu'r gystadleuaeth 'Dweud jôc' ar agor drwy'r nos, ond Jac a Wil (Llyr a Gethin Davies) aeth â'r wobr gyda Siân Morris, Anna Williams a Wyn Davies yn rhannu'r ail.

Cafwyd cryn hwyl ar y gystadleuaeth 'Adrodd am nôl' ond Y Dair Wraig Ddoeth a Mami ddaeth i'r brig am roi cymaint o ystyr i mewn i "Mynd ar y ceffyl". Girls Aloud yn adrodd Gee Geffyl Bach wrth gerdded am nôl o gefn y llwyfan am ymlaen ddaeth yn ail; gyda'r plant yn canu "Dau Gi Bach" yn dod yn drydydd.

Daeth nifer dda iawn o geisiadau llenyddol i mewn a chafodd y beirniaid gryn pen tost yn dewis y goreuon a'r dyrfa gryn hwyl wrth wrando arnynt yn cael eu darllen. Hedd Davies oedd enillydd y limrig yn cynnwys y llinell "Daeth Dewi Pws i Gellifôr" neu "Na fenwod yw Rocesi'r Fro", gydag Anna Williams yn dod yn ail agos a Leila Evans yn dod yn drydydd. Ei chwaer Enfys Howells oedd enillydd y frawddeg o'r gair Cwm Gwaun, gyda Rhian Davies yn dod yn ail a Gareth James, Caerdydd yn drydydd. Chris Howells ddaeth i fyny â'r frawddeg orau gyda phob llythyren yn dechrau gyda 'C', gyda Rhian Davies yn dod yn ail a Leila Evans yn drydydd.