Sùil air a' Mhapa 12
Eadar. Between. E-A-D-A-R. Eadar. Bidh sinn ag ràdh ‘Tha mi eadar dà bharail’ – I’m between two opinions, I’m undecided. Tha am facal ‘eadar’ a’ nochdadh cuideachd air a’ mhapa. ’S e an eisimpleir as ainmeile – Eadarra-Chaolas no Eddrachillis – sgìre mhòr ann am fìor cheann an iar-thuath tìr mòr na h-Alba. Tha sin a’ tighinn bho Eadar Dhà Chaolas ‘between two kyles’. ’S iad an dà chaolas – An Caolas Cumhang (Kylesku) agus Caolas Dhiùranais (The Kyle of Durness).
Faisg air a’ Chrìon-Làraich, tha bealach eadar a’ Bheinn Mhòr agus Stob Binnein. ’S e an t-ainm air ‘Bealach Eadar Dhà Bheinn’ – the pass between two mountains. Faisg air Ullapul, tha loch ann air a bheil Loch Eadar Dhà Bheinn. Ann an Ratharsair tha dà bhaile faisg air a chèile – am Baile Meadhanach agus Baile a’ Chùirn. Tha loch eadar an dà bhaile. ’S e an t-ainm a th’ air Loch Eadar Dà Bhaile.
Ann an Sgìr’ Ùig’ ann an Leòdhas, tha baile beag air a bheil Ardroil ann am Beurla. ’S e sin Eadra Fhadhail ann an Gàidhlig. Ach, air a’ mhapa, chì sibh an t-ainm tùsail – Eadar Dhà Fhadhail ‘between two sea fords’. Agus sin far a bheil am baile stèidhichte – eadar dà fhadhail.
Anns an Eilean Sgitheanach, tha dà choire làimh ri chèile – Coire nam Bruadaran agus Coire na Seilg. Agus dè an t-ainm a th’ air an druim eadar an dà choire? Bidh fios agaibh – Druim Eadar Dà Choire! Beannachd leibh.
