91Èȱ¬

Tair drama mewn un noson gyda'r beiriniad anhygoel, Maldwyn John o Fethel yn cloi'n ardderchog ac yn llawn hiwmor. Diolch cynnes iddo fo am gadw at ffraethineb y noson. Sylwadau megis y cyfeiriad at sylw gwraig a eisteddai wrth ei ymyl pan gyfeiriodd honno at y ffaith fod cast ffermwyr Ifanc Ysbyty Ifan wedi cael hwyl wrth ddysgu'u drama. 'Dysgu' meddai'r beirniad gan godi'i aeliau'n awgrymog. Cafwyd sawl sylw bachog tebyg ganddo gyda'r gynulleidfa enfawr yn werthfawrogol iawn o'i sylwadau.

Cofiwch nid 'Mr Williams' o enwogrwydd y gyfres '9 tan 9' oedd yr unig un i fod yn ffraeth. Clywyd un o'r Gweinidogion lleol yn ebychu'n groch ar ddiwedd drama Padog ei fod wedi bod yn gwylio "drama smashing" ac roedd yn rhaid ichi fod yn bresennol i weld pwynt y sylw yma.

Cafwyd ambell i sylw edmygus a rhai anweddus am goesau 'Iola Hughes' yn nrama Penmachno hefyd. Yn sicr, nid yma yw'r lle i'w hailadrodd.

Mentrodd cwmni Padog am y tro cyntaf ers blynyddoedd o'r difrif i'r digrif wrth berfformio cyfieithiad Richard Morris Jones o ddrama gan y Gwyddel Sean o'Casey sef, "Dechrau'r Diwedd". Ni welwyd erioed cymaint o falu llythrennol ar y llwyfan - nid malu cacan choclet na malu baw neu g... ond malu gwydr a thegan o bob math.

Torri rhannau o'r corff hefyd a choeliwch chi fi, 'roedd lleisiau'r ddeuawd William John a John William yn ddigon i amharu ar glyw rhywun. Fodd bynnag, bu'r perfformiad yn un ddigon safonol i ennill prif wobr y noson i'r cwmni ac, yn wir i ennill Tlws y cynhyrchydd gorau i Elfed Williams - gwobrau haeddiannol ym marn llawer.

Drama newydd o'r enw "Digon o Waith" gan Geraint Thomas oedd cynhyrchiad Penmachno. Drama hynod hwyliog a difyr gan aelod sydd wedi cefnogi'r ŵyl o'r dechrau. Bu perfformiad caboledig Siân Rhun fel Iola ie, yr un Iola a gyfeiriwyd ati ynghynt yn ddigon iddi ennill y wobr am yr actor/es orau yn yr ŵyl gyfan.

"Caffi Sam" gan Rhys Llwyd oedd teitl drama 'Sbyty a gwelwyd llond llwyfan o actorion ifanc yn mwynhau' perfformiad yn fawr. Atgoffwyd 'Sam' un tro o un llinell benodol go bob un o weddill yr actorion ar y llwyfan ac fe'i mynegodd yn anghywir wedyn. Bu digrifwch ac awydd Lowri Bryn Ddraenen o 'arwain' gweddill y criw yn ddigon iddi ennill y wobr am yr actores fwyaf addawol o dan 18 oed.

Yn wir, ni fedrech fod wedi cael noson fwy difyr o ran ffraethineb gwerinol Cymreig cefn gwlad ar ei orau. DIOLCH i bawb a fu'n ymwneud âr ŵyl mewn unrhyw fodd ac, yn barod edrychaf ymlaen at Chwefror 2005