91Èȱ¬

Eleni y mae chwaraewyr Adran 2 wedi anrhydeddu Mark Jones o dîm Wrecsam trwy ei ddewis ar gyfer tîm Adran 2. Mae hyn yn glod arbennig i Mark gan nad ydy tîm Wrecsam eleni - oherwydd problemau arian¬nol yn bennaf - wedi mwynhau'r tymor mwyaf llwyddiannus yn ei hanes.

Aeth Mark sy'n fab i Allan Victor Jones ac Alison Winn, Stryt Las i Ysgol y Wern lle dechreuodd chwarae i dimau dan 9 a than 10 y Rhos o dan ofal John Glassby. Aeth yn ei flaen wedyn i Ysgol y Grango lle cafodd ei hyfforddi ymhellach gan Mr P. Phillips. Fe chwaraeodd i holl dimau'r ysgol yn ystod ei gyfnod yno ac yn ogystal fe chwaraeodd Mark i dîm dan 12 y Rhos.

Cyn hynny, fodd bynnag, pan oedd o'n aelod o dîm dan 10 y Rhos fe chwaraeon nhw yn y ffeinal ar y Cae Ras yn Wrecsam ac fe wnaeth Mark ddigon o argraff yn y gêm honno i Glwb Wrecsam ei arwyddo. Pan oedd o'n ddigon hen fe aeth o ar gynllun ieuenctid y clwb a chwaraeodd i'r tîm cyntaf yn erbyn Caerwysg pan oedd o'n ddim ond dwy ar bymtheg oed. Bellach, fel mae anrhydedd ddiweddaraf ei gyd-chwaraewyr yn profi, mae'n aelod blaenllaw o'r tîm cyntaf.

Ar ben hyn mae wedi ennill tri chap dan 21 i Gymru ac roedd gan John Toshack hefyd ddigon o ffydd yn ei allu i'w gynnwys ar y fainc ar gyfer gêm ddiwethaf Cymru yn Stadiwm y Mileniwm. Mae Mark yn gobeithio mynd cam ymhellach ddiwedd y mis hwn a chael chwarae rywfaint o'r gêm pan fydd Cymru'n mynd ar daith i San Sebastian. Yn ogystal â hyn mae o'n gobeithio cael ei ddewis unwaith eto i'r tîm dan 21.

Mae Mark sy'n hapus yn byw adref yn y Rhos wedi arwyddo cytundeb newydd efo Wrecsam ar gyfer y tymor nesaf. Ond mae'n dweud mai ei obaith wedi iddo ennill mwy o brofiad ydy ymuno ag un o glybiau mawr y Brif Adran. Yn wir, ei freuddwyd fyddai chwarae i Man U.

A phwy â ŵyr efo'i allu cynhenid a'i hunan ymroddiad amlwg na ddaw hynny'n wir. Ac y gwelwn ni Fark arall o'r ardal, yma'n gwneud ei farc efo Manceinion yn ogystal â Chymru.

Ein llongyfarchiadau a'n dymuniadau gorau i Mark.