91Èȱ¬

Mae Clwb Pêl-Droed Wrecsam wedi cymryd rheolaeth o'r tîm a bydd y Crusaders yn chwarae 11 o'u 13 gêm gartref ar y Cae Ras, gyda'r ddwy arall yn cael eu chwarae yn Ne Cymru.

Yn ôl Prif Weithredwr Wrecsam, Paul Retout: "Mae dod â'r 'Super League' i Wrecsam yn cyfateb i ddod â phêl-droed yr Uwch Gynghrair i Gymru. Mae'r Crusaders yn rhoi Wrecsam ar y map. Mae'n newyddion gwych i'r dref, i Gymru ac i rygbi'r gynghrair".

Dywedodd Prif Hyfforddwr y tîm, Brian Noble, ei fod yn awyddus i'r tîm gynrychioli Cymru, ac i ddatblygu chwaraewyr ifanc o Gymru. Mae sawl chwaraewr Cymraeg eisoes yn y garfan fel Jordan James, capten y tîm cenedlaethol, ac mae Iestyn Harris, cyn seren Cymru yn y ddau gôd rygbi, yn is-hyfforddwr. Ryan O'Hara yw capten y tîm.

Dinas Wrecsam?
Mae dyfodiad y Crusaders yn ddatblygiad arall yn Wrecsam a fydd yn ychwanegu at gais cryf y dref i ennill statws dinas yn 2012. Mae llawer yn credu ein bod eisoes yn ddinas ym mhob ystyr heblaw enw, ac mae sefydlu Prifysgol Glyndwr ac agor Canolfan Siopa Dôl yr Eryrod wedi cadarnhau hyn. Gyda dyfodiad yr Eisteddfod Genedlaethol yn 2011 mae hi'n adeg cyffrous, a phrysur, yn hanes y dref.