91Èȱ¬

Cawsom gyfle i ymweld â nifer o drefi hynafol hardd, Trebon, a Cesky Krumlov, a'u toeau coch, adeiladau lliwgar patrymog a'u strydoedd culion caregog.

Ymweld â bragdy Budweiser
Yn ogystal, cawsom gyfle i ymweld â bragdy Budweiser Budvar a gweld y gwaith a'r gwahanol brosesau bragu cwrw.

Roedden ni yn canu yn Neuadd y Marchogion mewn Chateau yn nhref Jindrichuv Hradrec ar y nos Lun, a chafodd y côr, unawd Elin, deuawd Elin a Morfudd a Thriawd Triglwm ymateb gwych gan y gynulleidfa werthfawrogol.

Yna, dydd Mawrth dyma droi ein golygon i gyfeiriad Prâg, neu Praha. Cawsom yma ddigon o gyfle i grwydro'r dref hardd a'i hadeiladau gwych. Aethom i ymweld â Sgwâr yr Hen Dref, y cloc enwog, y castell a'r Eglwys Gadeiriol.

Trip ar yr Afon Valta
Ar y nos Fercher, aethom am drip ar yr Afon Valta a hefyd gweld y Kirzik Fountain Show, cyfuniad cyffrous oedd hwn o ddwr, golau a cherddoriaeth ac roedd yn werth ei weld.

Brynhawn dydd Mercher cawsom y profiad arbennig o ganu yn eglwys Sant Nicholas ar sgwâr yr Hen Dref.

Ar y nos lau roeddem yn canu yn Eglwys Sant Giles yn Nymburk, ychydig y tu allan i Praha. Roedd y cyngerdd hwn yn rhan o ddathliad bywyd y cyfansoddwr Czech o'r 18ed ganrif, B M Cernohorsky.

Gwrando ar gôr lleol
Yn ystod rhan gynta'r cyngerdd cawsom glywed côr lleol yn canu offeren o waith Dvorak, a ninnau yn canu yn yr ail hanner.

Unwaith eto cafodd y côr a'r unigolion groeso a derbyniad ardderchog gan gynulleidfa oedd yn amlwg yn mwynhau pob math o gerddoriaeth.

Diwrnod yn Praha ar y dydd Gwener cyn troi am adre wedi cael taith fythgofiadwy.