ICT a' sireadh 脿rd-choidse 霉ire
Tha Caley Thistle Inbhir Nis a' sireadh àrd-choidse ùire is iad air Billy Dodds a chur às a dhreuchd.
Chaill an leas-mhanaidsear Barry Wilson a dhreuchd cuideachd.
Chaill Inbhir Nis 1-0 ri Raith Rovers Disathairne is iad a' suidhe aig bonn an Championship.
Bha Dodds os cionn na sgioba fad dà bhliadhna.
Ràinig iad a' chuairt dheireannach de na play-offs ann an 2021/22 far an do chaill iad ri St Johnstone.
Chrìochnaich ICT san t-siathamh àite san Championship air an t-seusan seo chaidh ach stiùir Dodds iad dhan chuairt dheireannaich de Chupa na h-Alba, far an do chaill iad ri Celtic.
Dh'fhàg sin gun d' fhuair Dodds cùmhnant ùr dà bhliadhna as t-Samhradh.
Chan eil an sgioba air geama lìge a bhuannachadh air an t-seusan seo is Dodds is Wilson a-nise air na h-obraichean aca a chall.
Ann am brath, taobh a-muigh air-loidhne, thug ICT taing dhan dithis is iad ag ràdh gun robh iad air obair mhòr a dhèanamh aig a' chluba.
'S e co-dhùnadh fìor dhuilich a bh' ann na cùmhnantan aca a thoirt gu ceann, thuirt iad.
Dh'innis an cluba ge-tà, nach robh suidheachadh a' chluba air an t-seusan seo thuige seo math gu leòr.
Thuirt an cluba gu bheil iad an dòchas àrd-choidse ùr fhastadh a dh'aithghearr is gur iad Iain Robasdan is Charlie Christie a bhios os cionn na sgioba san eadar-ama.
