Tr矛 buidhnean air 霉idh a shealltainn ann an ICT is ceathrar chluicheadairean a' falbh
Dh'innis luchd-rianachd Chaley Thistle Inbhir Nis gu bheil trì buidhnean thuige seo air ùidh a shealltainn anns a' chluba.
Chaidh ICT ann an rianachd Dimàirt.
Chaill Donnchadh Fearghasdan a dhreuchd mar mhanaidsear a' chluba Diciadain is tha an cluicheadair aghaidh Billy MacAoidh a-nise a' ruith na sgioba còmhla ri Scott Kellacher.
Dhearbh an luchd-rianachd BDO Diardaoin gu bheil ceathrar chluicheadairean air falbh cuideachd, ach nach eil buaidh air luchd-obrach eile a' chluba.
'S iad Adam Brooks, Cameron Fearghasdan (mac Dhonnchaidh), Flynn Duffy is Wallace Duffy a tha a' fàgail.
A thuilleadh air sin tha Jack Newman, a bha aig ICT air iasad, air tilleadh gu Dundee United.
Tha Ailean Savage, a bha na chathraiche air Caley Thistle is a thill dhan chluba as t-samhradh mar fhear-comhairleachaidh, air gealltainn gum bi airgead gu leòr ann airson faighinn gu deireadh an t-seusain.
Thuirt Mgr Savage gu bheil oidhirpean a' leantainn gus airgead a thogail is dh'iarr e air HIE is Comhairle na Gàidhealtachd a dhol an sàs, is air gnothachasan ionadail taic a thoirt seachad.
Dh'innis e cuideachd gu bheil iad an dòchas gun gabh companaidh taigh-bìdhe thairis an Highlander Suite aig Pàirce Chaledonian.
Tha fear den luchd-rianachd, James Stephen, a bha an sàs le Rangers is Hearts nuair a bha iadsan ann an rianachd, ag ràdh gu bheil toiseach a' phròiseis air cothrom às ùr a thoirt do dh'ICT.
"'S e am prìomh amas a-nise an cluba a ghlèidheadh. Tha fios aig a h-uile duine gu bheil an cluba air a bhith a' call airgid a h-uile mìos".
"Tha ùine againn - mìosan seach seachdainnean, is tha Ailean air a ràdh nach leig e leis a' chluba ruith a-mach à airgead".
Dh'iarr Mgr Stephen air luchd-leantainn taic a chumail ris a' chluba.
Cha deach innse cò an fheadhainn a tha air ùidh a shealltainn sa chluba.
Aig an dearbh àm, thuirt Bryan Jackson, a tha na eòlaiche air ionmhas a' bhuill-choise is a chuidich clubaichean eile tro rianachd, gu bheil esan misneachail gun tig ICT tron staing a th' ann.
