Dearbaidh Bh脿ideanach an Cupa MhicTh脿mhais
Chaidh seann nàimhdean Bhàideanach a thaghadh an aghaidh a chèile sa chairteal-chuairt dheireannaich de Chupa MhicThàmhais.
'S e an geama sin eadar Baile Ùr an t-Slèibh is Ceann a' Ghiuthsaich a ghlac aire mhòran nuair a chaidh an taghadh a dhèanamh Diluain ann am Bun-sgoil a' Bhaile Ùir.
Choinnich na sgiobaidhean san fharpais an-uiridh nuair a chuir Ceann a' Ghiuthsaich am Baile Ùr a-mach às a' chupa.
Cha d' fhuair Ceann a' Ghiuthsaich an làmhan air an duais air a' cheann thall ge-tà, is iad a' call 3-2 ri Ceann Loch Seile sa chuairt dheireannaich.
Bidh ainm diofraichte air a' chupa am-bliadhna is Ceann Loch Seile fhèin air a dhol a-mach an aghaidh Lòbhait Disathairne seo chaidh.
Farpais
Chaidh Lòbhat a thaghadh aig an taigh an aghaidh Chill Mhàilidh san ath-chuairt.
Bidh Camanachd an Eilein Sgitheanaich an aghaidh na Manachainn aig Pàirc nan Laoch sa chairteal-chuairt dheireannaich.
'S e sin a' chuairt dheireannach a bh' ann an Cupa a' Bhaile Mhòir an-uiridh, geama a bhuannaich na Sgitheanaich 3-1, is dùil cuideachd gum bi na sgiobaidhean seo a' farpais aig mullach na Lìge Nàiseanta am-bliadhna 'son àite sa Phrìomh Lìog.
Gu dearbh, coinnichidh iad san lìog ann am Port Rìgh Disathairne seo tighinn.
Tha an taghadh air fad ann an Cupa MhicThàmhais mar a leanas:
Cupa MhicThàmhais - Cairteal-Chuairt Dheireannach
Camanachd an Eilein Sgitheanaich - A' Mhanachainn
Lòbhat - Cill Mhàilidh
Baile Ùr an t-Slèibh - Ceann a' Ghiuthsaich
An Gearasdan - Cabar Fèidh / Gleann Urchadain
Thèid na geamaichean a chluich Disathairne an 16mh den Ghiblean.
