Seusan l矛g 霉r air f脿ire
Dh'fhaodadh nach b'urrainn dùbhlan nas cruaidhe a bhith mu choinneimh Ross County anns a' chiad gheam aca ann an seusan ùr na Prìomh Lìg Disathairne.
Tha County a' siubhal a Ghlaschu airson cluich an aghaidh Celtic a tha a' dìon an tiotail a bhuannaich iad san dà sheusan mu dheireadh.
Thuirt sgiobair na Staggies, Jack Baldwin, gu bheil iad a' dèanamh fiughair ris a' gheam.
"Tha sinn air bhioran air a shon," thuirt e.
"Feumar sgiobaidhean leithid Celtic agus Rangers a chluich uaireigin tron t-seusan co-dhiù. Tha e a cheart cho math a dhèanamh air a' chiad là den t-seusan.
"'S iad seo na geamaichean anns a bheil thu ag iarraidh cluich, gad fheuchainn fhèin an aghaidh nan cluicheadairean is fheàrr, anns na stèideaman is fheàrr."
Anns na geamaichean eile Disathairne, cuiridh Dùn Dè fàilte air Tobar na Màthar, tha Obar Dheathain air falbh bhon taigh an aghaidh Bhaile Dhùn Lèibhe, cluichidh St Johnstone an aghaidh Hearts ann am Peairt agus tòisichidh Rangers an iomairt acasan an aghaidh Chille Mheàrnaig.
Thèid Hibs an aghaidh St Mirren Là na Sàbaid.
Championship
Ann an Championship na h-Alba feuchaidh Caley Thistle Inbhir Nis ris an iomairt aca ann an Cupa na Lìg a chur air an cùlaibh nuair a chluicheas iad a' chiad gheam aca san lìg an aghaidh Queen's Park.
Cha do bhuannaich sgioba Billy Dodds ach aon gheam aig ìre na buidhne de Chupa na Lìg an aghaidh Bonnyrigg Rose, is iad a' call ri Dùn Breatann, An t-Àrd Ruighe agus Dùn Dè.
An àite sin, bidh iad airson cuimhneachadh air mar a chluich iad aig deireadh an t-seusain a chaidh, nuair a thàinig iad faisg air playoffs na Prìomh Lìg a ruighinn as deidh dhaibh a bhith cho fada air dheireadh agus nuair a ràinig iad cuairt dheireannach Chupa na h-Alba.
Bidh Partick Thistle ge-tà airson dìochuimhneachadh mar a chrìochnaich an seusan mu dheireadh dhaibh-san.
Bha Thistle trì tadhail air thoiseach le 20 mionaid air fhàgail san dàrna geam de chuairt dheireannach playoff na Prìomh Lìg an aghaidh Ross County.
Ach gu h-iongantach thill Ross County 'son tighinn am bàrr air breaban-peanais.
Tha sin a' fàgail Thistle air ais aig toiseach na slighe a dh'ionnsaigh na lìg is àirde, is thèid iad an aghaidh Raith Rovers sa chiad gheam aca.
Anns na geamaichean eile Disathairne cluichidh Dùn Phàrlain an aghaidh an Àrd Ruighe agus thèid Morton an aghaidh Inbhir Àir.
Chaidh cùisean a chur gu dol oidhche Haoine ge-tà le Dundee United a' buannachadh 4-0 an aghaidh Obar Brothaig.
