91热爆

On days like this ye just want tae stop the world for a peedie while and just stand and stare.
Here is my wee island this morning ye see.....
In the east, ower the fields, the sun lies just below the horizon. But she throws oot jewels o red and pale pinks, orange and gold and the light o it flows ower the fields, noo shorn o their crops and waiting for winter.
There`s no a breath o wind oot there so there`s a hush ower the isle that is nearly tangible, a special quiet it is, afore folks get up and oot and aboot daeing what they dae for the days work.
But for noo, it`s fine and calm and if ye gaun oot in it, ye can feel like the only person awake, and standing beneath that huge colourful sky can mak ye feel awfy peedie....
The sea, whipped up intae a moody rage by the past few days winds, is still choppy and rough looking, wi white horses riding the deeper slate roads o it, but for a that it`s a bonny sight tae.
And yours truly, oot this morning in that twilight just afore sunrise, just stood and gawped like a wee bairn at the still sleeping peace o this place, and then I heard them, the wild geese, for a me lamenting the lack o them a whiles back, they are here noo!
Whole flocks o them thick in the skies, flying their arrow-flights tae settle in fields and aside the ponds, and ye ken, there`s no much o a bonnier sight tae see, or hear, the grace o birds and the song o northern places a deal mair caulder and sharper and less kind than here.
Tae look up intae a sky bright wi colour and rich wi gold, tae see the outline o creatures yours truly could sometimes envy for their freedom, maks for such a bonny start tae the day.
I wouldnae swap such moments for onything.
So if ye see a wee wifie standing gawping like a bairn at the world aroond her, it`s just me, looking at the world wi that bairns eyes again.