91热爆

Trydargerdd (sef cerdd gaeth neu rydd sydd, fel un o negeseuon Twitter,

heb fod dros 140 o nodau cyfrifiadurol): Neges o Anogaeth

@yllewdu O'n dal yn ysbrydoliaeth wastadol a 'studio'n barddoniaeth, daw

dydd pan dry'ch prydyddiaeth chithau'n awen gymen gaeth.

Llion Jones - 8.5 pwynt

Daw’r alwad a’i her eilwaith – i’r Alban,

O’r helbul diobaith,

A’r hyn a fethodd unwaith

Yn nesáu fel ’97.

Rhodri Siôn - 9 pwynt

Cwpled caeth yn cynnwys y gair ‘clais’

Hawlio pont, ond cloi Panty.

Mae ’na glais uwch llais y lli.

Ifan Prys - 9 pwynt

Haeddais y clais am hel clecs

go greulon am griw’r Alex.

Carwyn Eckley - 8.5 pwynt

Limrig yn cynnwys y llinell ‘Daw’r oglau yn ôl â’r atgofion’

Fe'n profwyd ni eto'n daeogion.

O lyncu celwyddau gelynion

A'n hudodd i wae

Y Brexit hoff bau:

Daw'r oglau yn ôl â'r atgofion.

Emlyn Gomer - 8 pwynt

Gwerth ffortiwn o hen focsys sglodion

Yn gymysg â’r holl ddillad budron

Ond heno yn Panty

Hiraethaf am hynny

Daw’r oglau yn ôl â’r atgofion.

Marged Gwenllian - 8.5 pwynt

Cerdd ar fesur yr englyn milwr (rhwng 9 a 15 llinell): Coridor

Ger Ffynnon* y gorffennol,

doe yn awr sy’n ffrydio’n ôl

a rhedaf fel lli’r Rheidol

heibio i ddrysau ffrindiau ffraeth

hyd wâl yr hen frawdoliaeth,

un llain hir yn llawn hiraeth.

Cornel o Bantycelyn

am ryw hyd oedd Cymru ei hun

a’r iaith yn sodro Rhuthun

led ’stafell o Lanelli.

Drwy rwydwaith ein direidi

fan hyn roedd gwladfa i ni

ar adeg byw delfrydau

rhwng cysur cyfyng furiau’r

Ffynnon hon, pan o’n i’n iau.

* coridor bois y drydedd flwyddyn yn Neuadd Pantycelyn.

Llion Jones - 10 pwynt

Hastiodd i Aberystwyth

A’i fýs o Lexus dan lwyth

O dyweli i’w dylwyth.

Estron mwy yw’r ffenestri-

Ond noc-noc a dyna ni:

Y daw ateb: Sut wyt-ti?

Mae’n gastell i’w fab bellach

Ar ben y coridor bach-

Ei olyniaeth o linach.

Hen ogof llawn atgofion

O ddoe ydyw’r neuadd hon

Sy’n anwesu hanesion.

Ac anfarwol hudoliaeth

Derw sy’n codi’i hiraeth

Wrth wae ei ddyddiau a aeth.

Carwyn Eckley - 9 pwynt

Pennill ymson swyddog tollau

Arestiais gaws o'r Swistir,

Pum rhidyll, chwe twll clo,

Dwy ddonyt a naw Polo Mint,

Tri crwybr mêl, un stro,

Dwy glust, plot cyfan Madam Wen,

Un ogof, un blac hôl -

A'm gwobr am fy llafur? Sac!

Dwi ddim yn dallt yn 'tôl...

Emlyn Gomer - 8.5 pwynt

Mae Heathrow’n lle da am anrhegion,

Yn rhinwedd fy swydd caf fargeinion.

Rwy’n conffysgeto poteli gwîn,

A drygs ‘di cuddio lan tyllau tîn.

Cennydd Owen Jones - 8.5 pwynt

Cân ysgafn (heb fod dros 20 o linellau a heb fod yn soned): Ailfrandio

Trafaeliais i Ddulyn i’r gêm bêl-droed fawr,

Mi hwyliais yn hytrach na fflio,

Ac er na fûm ’rioed ‘i gyrrau Brazil’

O’n i’n gweld y lle’n debyg i Rio.

Am ginio cyn gêm fe aethom i b峄砨,

Roedd ’na fwydlen o’n i isio’i thrio,

A chogydd byd-enwog a wnâi bethau mawr

Efo sosban jips a phadell ffrio.

Ond och, roedd llygoden Ffreinig yn rhydd

Yn y gegin pan ddigwyddais i sbio;

Erbyn dallt, ’nifail anwes y cogydd oedd hwn

(Roedd rhywun wedi dwyn ei gi o).

Roedd y cinio yn flasus, ond pan ddaeth y pwdin roedd y ll’goden wen wedi’i ddifrïo:

Yn y sos brandi poeth roedd ôl traed y cr’adur, ac mi glywn i aroglau’i bi-pi o.

Roedd y pwdin a’r brandi ’di sbwylio i gyd, a wir, o’n i bron isio crio,

Ond twt, meddai’r cogydd, mi ro’i frandi newydd, ac aeth ati i’w ail-frandïo.

Â’i byth eto i Ddulyn, mae’r lle yn llawn rafins,

Gwehilion sydd ’mond i’w pitïo.

A wna’i byth yfed brandi, mae’n troi arna i nawr

Os prynir un imi, gewch chi o.

Geraint Lovgreen - 8.5 pwynt

A glywsoch chi’r holl dwrw

Fu’n Y Badell ac yn sêl?

‘Di’r “Bala Was” ‘myn hapus

Mai ‘u henwau nhw sydd ar y jêl!

Mi lunian nhw betishwn

A chael eitem 91热爆

“Does bosib bo’r carcharorion

Yn bobl Bala go iawn fel ni!”

“Ni chawn nhw ddefnyddio’n henw

Oni bai bo’ nhw’n canu cerdd-dant,

Yn ffarmio a’n cynganeddu,

Hwdwch hone i “Mr Trent”!

“Ma’r peth yn hollol warthus,

Be’ fyddai’r Coch Bach yn ‘i feddwl o hyn?

‘De nhw ‘sho’n Thomas Charles ni fyd?

Neu dod i fyw’n Glan-Llyn?!”

Mi weithiodd y protestio

Diddymwyd y teitl “Bala”

‘rôl canfod enw llawer gwell,

fwy addas – Copa'r Wyddfa.

Marged Gwenllian - 8.5 pwynt

Ateb llinell ar y pryd

Oes, reff, mae amser ar ôl

i frathu yn gyfreithlon.

0.5 pwynt

Telyneg (heb fod dros 18 llinell): Ffolineb

Tynna’i sgert yn is, wrth gerdded mewn â’i ffrindiau;

eu rhewi’n drindod wên, â hudlath ei ffôn o’u blaen.

(Heb lun, heb ddigwydd.) Rhaid rhannu’r eiliadau...

cyn bod sodlau, a sugno diod drwy welltyn,

yn creu ...atyniadau.

A chydia’r gynta’ yng nghrys ei chymar newydd,

a’i dywys fel gwobr, at lawr y ddawns.

Dacw’r ail, a’i dwylo’n gwneud tonnau...

‘Hei, Macarena!’

Toc, mae un yn codi llaw, a’r llall a ddiflanna...

Ac mae’r un sydd ar ôl, mewn cornel dywyll,

(â’i band- gwallt- clustiau- cath

yn taeru bod hi’n cael amser da)

yn prysur bwnio negeseuon i’w ffôn,

a’i hwyneb yn welw yng ngolau’r sgrîn.

Mae’n twtio’i llywethau. Fflachio gwên eto...

Hunlun arall i wadu’r hunlle;

ebychiad arall mewn monolog o luniau...

Ifor ap Glyn - 9 pwynt

Yn Aber un nos Wener

Fe fues yn fachgen ffôl.

Fy nghalon yn llawn trymder,

Cha’ i byth mo’r cyfle nôl.

Rhwbeth twp rwyf yn dyfaru:

Gadael hon, ‘ro’n i’n ei charu.

Yng nghanol yr holl firi,

Yr hwyl a’r canu iach,

O’r Llew Du es yn dawel

Ar ben fy hunan bach.

Ni chaf eto fyth mo’r pleser –

Gedais fy niod ar hanner.

Cennydd Owen Jones - 8.5 pwynt

Englyn: Tlws

Chwe stadiwm, chwe astudiaeth o’n diléit

am dlws pencampwriaeth

ond wele gae cenedl gaeth

yn sigo’n dywysogaeth!

Ifan Prys - 9 pwynt

Feuryn, gwna rhyw nodyn i ni – o swm

Sy’n si诺r o’th ddigoni,

A rho’n rhodd, am dy noddi,

Y tlws hardd i fardd fel fi.

Rhodri Siôn - 9 pwynt

Enillwyr - Tim Caernarfon.