91热爆

Trydargerdd: Hysbyseb gan gwmni yswiriant.

Bydd ein siwrin hollgynhwysol

Yn dy warchod yn bwrpasol,

Gwarant fydd rhag pob digwyddiad

O dywyllwch nos y codiad

At oleuni’r atgyfodiad.

John Wyn- Bro Alaw. (8.5 pwynt)

Dim giamocs, dim gondolas, dim setiau crand, dim arias. Cyn i’ch bywyd droi yn llwch, dewch atom ni, cymharwch!

Richard Lloyd Jones- Llanrug. (8 pwynt)

Cwpled caeth yn cynnwys y gair “glas”

Mae’n hwyr glas rhoi meini’r glyn

Yn wal i atal gelyn.

Ioan Roberts-Bro Alaw. 9 pwynt

Er cysgu, glasu wna’r glog

eilwaith; daw’n wanwyn deiliog.

Dafydd Whteside Thomas-Llanrug. (8.5 pwynt)

Limrig yn cynnwys y llinell “Y fi oedd y cyntaf o’r pentref/pentre/pentra”

“Y fi oedd y cyntaf o’r pentra”

I lisdio a sgwario’n y lifra’,

Ond ofar fu’r cyfan,

A thystio mae’r llechan

Mai fi oedd y cynta’n ôl adra.

John Wyn Jones- Bro Alaw. (8.5 pwynt)

Tra’n gweithio mewn ffatri gwneud arfa’

Y fi oedd y cyntaf o’r pentra

I bwyso rhyw fotwm

Efo rhybudd ‘Plwtoniwm’,

Fo hefyd, wrth reswm , oedd ‘rola.

Dafydd Whiteside Thomas a Iwan Roberts- Llanrug. (9 pwynt)

Cerdd ar fesur yr englyn milwr : “Oedfa”

Yn driw i’r cwrdd yn ddiwyd

 hen wraig T欧’n Graig ar hyd

Hunllef y strydoedd swnllyd.

Wynebu clebran aber,

Miri haf glan môr a’i her

I’w Saboth tawel, syber.

Dringo’r rhiw rhwng y criwiau

O gam i gam, côt ar gau,

Menyg a llyfr emynau.

Ninnau awn heibio’n heini

O Sul i Sul, heb sylwi

Anodded y daith iddi

Na gwybod am ei gobaith

Y daw dydd ei ffydd yn ffaith

A’r hwyl mewn oedfa’r eilwaith.

Richard Parry Jones- Bro Alaw. (9 pwynt)

OEDFA

( Bersonol ger Eglwys Cwyfan, Yr Eglwys yn y Môr)

 maen sydd rhy drwm i mi

i’w symud yn fy siomi,

ynys yw i’m tywys i.

Fy nod, dod fel cyndadau

dod i erw paderau

i grefu hedd, ymgryfhau.

Mynnu cymun â’m hunan

rwyf o elfennau Cwyfan,

mi, y môr a’r tywod mân.

Yn hwyr y nos yn nhir neb

cael rhinwedd o’m claerineb,

natur sy’n cynnig ateb;

aelod ydwyf ar Gwyfan

mi a’r gwynt yn morio’r gân,

a’i hen lith dry’n ddalen lân.

Richard Llwyd Jones- Llanrug. ( 9 pwynt)

Pennill Ymson dynwaredwr neu ddynwaredwraig

Ymsongan y Dynwaredwr

Bu’n fain ar ddynwaredwyr, ‘doedd dim galw o un lle,

Un diflas ydy Carwyn a gwleidyddion Kerdiff Be,’

Rhy borin ydy Corbyn a does neb yn nabod Mê –

Ond wedyn fe ddaeth Trump!

Canwn, bloeddiwn Haleliwia,

Daeth, fe ddaeth i ni fel manna,

Pedair blynedd dda – o leia’,

Diolchwn am gael Trump!

Ioan Roberts- Bro Alaw. (9 pwynt)

Pan af i oed ymddeol

A’m pensiwn yn y banc

Fe brynaf dafarn fechan

Ar lannau’r Fenai dlawd

Y gwel yr heicwyr aml yn berffaith glir

Wrth gerdded heibio ‘rôl eu teithiau hir.

A dyma fi yno

A’m dychymyg yn eroplen…

Pybs fy mebyd, Yr Antelope, Y Gazelle,

Ac ar fy llw, y pub lle’m maged – Y Weit-hôl,

Wrth fy nghefn mewn pob rhyw ddadl ffôl.

Duw a’m gwaredo, peidiwch â sôn

Dyma’r syniada unigryw a ddaw i ddyn

Tra’n eistedd yn nhafarn y Gardd Fôn.

Dafydd Williams, Llanrug. (8.5 pwynt)

Cân Ysgafn (heb fod dros 20 llinell a heb fod yn soned): Y Filltir Ychwanegol

[hy dilyniant Y Bore Coffi - Mae’r Steddfod Fawr yn dod yn nes, a ma’ nhw’n swnian isio pres ...]

‘Rôl y Bora Coffi llynadd ma’ Nhw’n swnian yn ddi-ddiwadd,

Steddfod isio pres a ninna’n gorfod adfer parch i’n pentra’.

Galwyd pwyllgor ond serch hynny ‘mond rhyw ddyrnaid wnaeth droi’i fyny

Dau gyfarfod, dyna’r cwbwl - wedyn roeddwn i mewn trwbwl.

Ymddiswyddodd Wili’r Buarth, wedi ddal mewn gwely diarth,

‘Mond un ddynas ddaeth i’r c’warfod achos dwylo Huw yr Hafod.

Y trysorydd aeth am wylia efo gwraig ei gyfaill penna,

Mae ‘di gaddo d诺ad adra ar ôl gwagio pwrs y gronfa.

Yr oedd petha’n ddu ofnadwy ond daeth Phil the Greek i’r adwy,

Aelod blaenllaw o’r frenhiniaeth, un fu’n gymaint ysbrydoliaeth;

Arwr nifer dda o’m cerddi, noddwr hael, hen gyfaill imi:

Rôl egluro y sefyllfa, yr roedd o a’i wraig, mewn dagra’!

Er ei bod yn amser caled fe agorodd Phil ei waled,

A chynigiodd hanner coron, tybed fyddai hyn yn ddigon?

Y fo a fi yn gwneud trefniada’ i gyfarfod ymhen tridia’,

Es i at ddrws ffrynt y palas a chael ordors gan ryw ddynas

I fynd rowd i’r talcian pella, a rhoi cnoc ar un o’r drysa:

Cerdded, cerdded, bûm am hydion - teimlo mod-i ’di cael digon.

Mynd i’r palas a chael croeso, fe nath Phil fel rodd o’n gaddo,

Roedd drws cefn er’n bell uffernol werth y filldir ychwanegol!

Geraint Jones- Bro Alaw. ( 8 pwynt)

Cerdded

Oriawr Fit-Bit, Garmin a Strava

Ydi’r ffasiwn ddiweddara;

Mesur camau fesul pellter

Mesur uchder, mesur amser.

Hel a didol ystadegau

A rhoi trefn ‘rôl casglu’r ffeithiau;

Mapio’r oll ar gyfrifiadur,

Creu trawstoriad o’r daith antur.

Yn yr oriawr mae pob troedfedd

Wedi ei mesur yn ddi-duedd;

Honni pellter maith tra’n troedio?

Does dim posib ceisio twyllo.

Modur

Rhowch i mi rhyw hen,hen, siandri

Fel yr un sydd heno gen i ;

Mae pob cloc ar hon yn methu:

Weithiau’n gyflym, - neu’n arafu.

Felly, fel sy’n digwydd heno

Pan fo angen costiau teithio,

Mathemateg greadigol

Roith sawl milltir ychwanegol.

Dafydd Whiteside Thomas.- Llanrug (8 pwynt)

Ateb llinell ar y pryd.

At ferw'r elw'r eilwaith

Awn I gyd yn ôl i'r gwaith

Bro Alaw. (0.5 pwynt)

Awn I gyd yn ôl i'r gwaith

Yn ôl am gyflog eilwaith.

Llanrug.

Telyneg - “Gwely”

Ei gyweirio’n ofalus â gofal y fam obeithiol

sy’n taenu’r gyfnas yng nghynnwrf yr aros

i dderbyn had i’w bru.

Gosod y gwely,

chwynnu a phriddo

cyn i’r gwlydd godi i ddenu

cusan yr haul a gofal y garddwr.

Sypiau o datw o dan bob gwlyddyn,

yr un maeth, yr un gynhaliaeth, yr un moethau

fel y plant a genhedlwyd ganddo

i dderbyn yr un iaith,

yr un Gair a’r un geiriau.

Yn awr yr aeddfedu,

tatw bwyta, tatw hadyd, tatw moch

i’w didoli ar gyfer y gyrnen

fel epil y fratiaith, y goethiaith

a’r di-iaith.

Cen Williams- Bro Alaw. (9.5 pwynt)

O’r Lôn Wen,

Ar heuldro’r gaeaf,

Syllaf ar belen aur ein bodolaeth

Yn suddo i wely’r gorllewin, am Iwerddon.

Daw anesmwythyd drosof

Wrth i silwét peilonau ar dramp,

A chysgod du’r Eifl,

Dynnu d诺fe’r diwetydd

Dros Fro Lleu ac Aber Menai…

Nes cofio,

Dan gwrlid y nos,

Y bydd hud Gwydion,

Serch Dwynwen,

A phair Matholwch,

Eto fyth yn dadeni gwawr

Dros erchwyn y dwyrain.

John Roberts- Llanrug. (9 pwynt)

Englyn: Calendr

Fe lwydda drwy’r holl flwyddyn – i nodi,

A’n cadw’n y darlun,

A’i werth ddaw o ddweud wrth ddyn

Mae’n hoedl yw munudyn.

Richard Parry Jones- Bro Alaw. (8 pwynt)

Dyddiad a digwyddiadau – yn eu trefn,

hefyd treigl yr oriau

Fore a hwyr drwy’n hoes frau

a ddeil hwn a’i ddalennau.

Dafydd Williams. Llanrug. (9 pwynt)

Enillwyr- Bro Alaw.