Buaidh chudromach do Chounty
Tha Ross County air trì puingean gu math prìseil fhaighinn dhaibh pèin agus iad a' dèanamh an gnothach air Baile Dhun Lèibhe 2-0 aig an taigh.
Chuir Alex Iacovitti am ball dhan lìon le cheann às dèidh 40m agus rinn Alex Samuel an aona rud às dèidh 61m.
B'e Yan Dhanda a chuir am ball nan rathad.
Chaidh Curtis Guthrie aig Baile Dhun Lèibhe a chuir far na pàirce aig 82m an dèidh dha cairt dhearg fhaighinn airson gàirdean mu aodann Kheith Watson.
Tha seo a' fàgail gu bheil County, a tha aig bonn a' Phrìomh Lìog, a-nise air 30 puing.
Chan eil County a-nise ach puing air dheireadh air Cille Mheàrnaig agus Dundee United.
Tha Baile Dhun Lèibhe an ìre mhath sàbhailte chanadh tu agus an sgioba aig Daibhidh Martindale 11 puing air falbh bho na trì sgiobannan a th' aig bonn a' Phrìomh Lìog.
