Cuairt camara caillte gu Cumbria
Chaidh camara le dealbhan bho fhear de na geamaichean as cudromaiche a-riamh aig Cluba Ball-coise a' Bhac a lorg còrr is 10 bliadhna an dèidh a chall.
Chaidh e à sealladh an dèidh Cuairt Dheireannach Cupa Amaitearach na Gàidhealtachd ann an 2011 anns an robh an sgioba Leòdhasach an aghaidh sguad Abhaich às an Eilean Dubh.
Chuir fear à Cumbria, Màrtainn Hill, fios air a' chluba bho chionn ghoirid 's e ag ràdh gun do lorg fear a tha càirdeach dha an camara ann am fèill cùl-chàraichean sa sgìre.
Chan eil fhios mar a fhuair an t-uidheam à Inbhir Nis gu Cumbria ach, gu mìorbhaileach, bha na dealbhan na bhroinn air maireachdainn.
Tha ùidh mhòr aig Mgr Hill ann an spòrs: "Choimhidinn air dà iasg òir ann am bobhla nan robh seacaidean rèisidh orra!"
Thuirt e nach tug e fada dha aithneachadh gur e ìomhaighean de sgioba a' Bhac a bh' annta, agus gun robh coltas ann gun deach an tarraing aig pàirce Caley Thistle Inbhir Nis.
Chuir e teachdaireachd gu duilleag FB a' chluba agus e airson a' chairt SD a thilleadh.
"Gu mì-fhortanach, cha deach an là leotha ach bha mi cinnteach às gum biodh ùidh aig na cluicheadairean ann a bhith a' faicinn nan dealbhan," thuirt e.
'S ann le Màrtainn Mac'illEathain, a tha an-dràsta a' cluich do sgioba Lìg na Gàidhealtachd, Brora Rangers, a bha an camara.
"Nuair a bha mi òg bha droch chliù agam airson a bhith a' call nithean.
"Tha ceist orm mu càite an do dh'fhàg mi an camara agus ciamar a rinn e a shlighe a Chumbria!
"Tha e air a bhith cho math coimhead air na seann dhealbhan seo agus tha mi fada an comain Mhàrtainn airson an cur air ais thugam," thuirt e.
Thuirt neach-labhairt Cluba a' Bhac gu bheil e do-chreidsinneach cho fada agus a mhair an camara agus a' chairt a bha na bhroinn.
"Ged a chaill sinn an là 'ud 's e cuimhneachain phrìseil a th' anns na dealbhan air là mòr ann an eachdraidh a' chluba.
"Thug seo gàire mòr air na balaich a' coimhead orra," thuirt iad.
Mar a thachair 's e Màrtainn Mac'illEathain an aon chluicheadair a chuir tadhal dhaibh nuair a chaill iad 5-1 an aghaidh Abhaich.
Tha Màrtainn Hill a-nis a' leantainn Cluba a' Bhac air na meadhanan-sòisealta agus leugh e gun robh stiùbhardan-parcaidh a dhìth orra airson tachartais.
Aig an taigh tha e a' cumail taic ri sgioba rugbaidh ionadail agus thuirt e nan robh e a' fuireach ann an Leòdhas gun dèanadh e aon rud do na Bacaich.
Tha e a' leantainn sgioba Liverpool ach thuirt e gur e sgioba a' Bhac a-nis an tè Albannach as fheàrr leis, agus gum biodh iad daonnan na chridhe.
Thuirt e: "Back FC, they're the one for me!"
