91Èȱ¬

Y bandiau
Mattoidz, Bob, Gola Ola

Awyrgylch
Mae awyrgylch y Cŵps yn wahanol i ganolfannau gigs eraill, yn fach ac yn 'intimate' sy'n dda gan eich bod yn teimlo'n agos iawn i'r bandiau. Gyda cynulleidfa dda yno roedd y bandiau hefyd fel petaen nhw'n mwynhau yr awyrgylch glos. Mae nosweithiau Naws wedi ail-sefydlu'r lle fel canolfan gigs tanddaearol.

Trac y noson
Nes i fwynhau nifer o ganeuon newydd set Mattoidz, ond hen ffefryn Y Dyn Telesales sy'n mynd â hi - cân sy'n adlewyrchu holl egni y grŵp.

Disgrifiwch y perfformiadau
Gola Ola
Dyma'r tro cyntaf i mi weld Gola Ola, er fy mod wedi clywed sôn amdanynt ers peth amser, felly doeddwn i ddim yn siŵr beth i'w ddisgwyl ond ches i ddim o'n siomi o gwbl ganddyn nhw. Roedden nhw'n dynn iawn am fand cymharol ifanc a roedd llais da iawn gan y prif ganwr a harmonïau lleisiol yn arbennig o dda. Roedd rhai o'r caneuon yn fy atgoffa o stwff cynnar y Manics, ond roedd amrywiaeth dda i'r set o roc trwm ac ambell i gan fwy ffynci. Set arbennig o dda gan y band o Borthmadog a dwi'n siŵr fod dyfodol iddyn nhw.

Bob
Mae Bob yn fand eithaf cyfarwydd i bobl Aberystwyth erbyn hyn, gyda cwpl ohonyn nhw yn y coleg yma. Fel arfer roedden nhw'n llawn egni a'i harddull pync trwm yn ysgwyd seiliau'r Cŵps. Aeth yr hen ffefryn, a chân mwyaf adnabyddus y grŵp, Defaid, lawr yn dda iawn wrth gwrs ac mae llais cras y canwr yn eithaf unigryw yma yng Nghymru. Braf gweld Bob yn chwarae yn y Cŵps am y tro cyntaf ers peth amser.

Mattoidz
Mae Mattoidz erbyn hyn wedi sefydlu eu hunain fel un o brif grwpiau'r sîn gerddoriaeth Gymraeg, rhywbeth gafodd ei gadarnhau wrth iddyn nhw ennill gwobr 'Band y Flwyddyn' yng Ngwobrau RAP eleni. Mae hyn yn bennaf, diolch i'w perfformiadau byw cyson a'r ffaith eu bod wastad yn denu torf i'w gigs. Mae'n amlwg fod y mwyafrif o'r gynulleidfa wedi dod yno i weld y 'Toidz a roedd pawb yn mwynhau eu perfformiad egnïol. Llwyddodd y grŵp i sefydlu perthynas dda gyda'r gynulleidfa o'r dechrau a chafwyd nifer o ganeuon newydd yn ogystal â hen ffefrynnau fel Angel a Sos Coch.

Tri band roc go iawn gyda'r ddau gyntaf yn gobeithio cyrraedd uchelfannau'r prif fand, ac mae pob gobaith ganddyn nhw ar sail y noson yma.

Uchafbwynt y noson
Roedd perfformiad Gola Ola arbennig o dda, ond yr uchafbwynt oedd cyflwyno cacen benblwydd i Steve, drymiwr Mattoidz a phawb yn ymuno i ganu pen blwydd hapus!

Peth gwaethaf am y noson
Fod dim mwy o'r gynulleidfa wedi cyrraedd yn ddigon cynnar i weld perfformiad Gola Ola.

Achlysur Roc A Rôl
Roedd hi'n amlwg fod drymiwr Mattoidz wedi cael sawl peint i ddathlu ei ben blwydd!!

Beth sy'n aros yn y cof?
'Drum-sol' y drymiwr tuag at ddiwedd set Gola Ola a lwyddodd i greu argraff ar bawb yn y gynulleidfa.

Talent gorau'r noson
Mae gan Gola Ola'r potensial i fynd yn bell.

Marciau allan o ddeg
8½

Un gair am y gig
Roc

Adolygiad gan Owain Schiavone

Cyhoeddwyd yr erthygl hon fel rhan o gynllun cyfrannu ar y cyd rhwng 91Èȱ¬ Cymru'r Byd ac Antur Teifi. Daeth y cynllun hwn i ben ar 31 Ionawr 2008.