Faint ohonoch sy' wedi clywed am y grŵp newydd Coda?. Maent yn dod o Ddyffryn Teifi ac wedi cynhyrchu CD. Wedi i mi glywed bod eu cryno ddisg newydd yn cael ei lansio, rhaid oedd ar unwaith fynd i'w phrynu.
Cenedl sydd wedi tyfu i fyny heb lawer o sîn gerddoriaeth fodern Cymraeg cyson ydym ni'r Cymry. Tan y chwedegau hwyr a'r saithdegau cynnar dim ond canu clasurol oedd yn derbyn clod yng ngwlad y gân. Newidiodd hyn i gyd gyda dyfodiad rhaglen nosweithiol "Y Dydd" pryd y daeth Dafydd Iwan i'r amlwg gyntaf. Erbyn hyn mae'r sîn wedi datblygu a nifer o berfformwyr wedi mynd a dod. Yn ddiweddar bu grwpiau fel Mega, Eden ac yn ddiweddar iawn Max-N. Ond byr fu eu arhosiad ac erbyn hyn mae'r rhain wedi diflannu o'r sin gerddoriaeth Gymraeg.
Symlrwydd y clawr
Wrth edrych ar CD y grŵp Coda, y peth cyntaf a'm trawodd oedd symlrwydd y clawr. Coda sef enw'r band yn blaen iawn ar groes o gefndir lliwgar a chynnes. Wrth agor y casyn rydym yn cael gwybod enwau a swyddi'r pedwar bachgen yn y band. Un yn chware'r drymiau, un yn brif leisydd a dwy gitâr.
Wrth wrando ar y CD am y tro cyntaf, roeddwn yn edrych ymlaen i glywed y caneuon. Sylwais bod arddull syml i'r caneuon, a hyd yn oed y gerddoriaeth. Teimlaf, yn aml bod bandiau Cymraeg sydd yn ceisio dod allan yn y byd cerddoriaeth yn cyfansoddi caneuon sydd yn rhy uchelgeisiol i'w gallu. Tuedda'r geiriau i fod yn arwynebol ac heb lawer o ddyfnder. Gyda Coda mae'n rhaid ystyried oedran, profiad byd cerdd a phrofiad bywyd bob dydd yr aelodau.
Deuthum i'r casgliad fod y mwyafrif o'r geiriau yn dderbyniol. Rhaid yw canmol y grŵp am fod yn wreiddiol ac am ysgrifennu geiriau a threfnu alawon hollol newydd ac unigryw. Mae hyn yn eu galluogi i weithio o fewn cwmpawd maent yn hapus a chyffyrddus ynddo. Bydd yn ddiddorol dilyn ei gyrfa a gweld y datblygiad cerddorol a geiriol.
Rydw i wedi dwli ar y gân gyntaf sef 'Cymer Fi.' Dim am unrhyw reswm yn benodol, ond teimlaf ei fod wedi 'clicio.' Yn enwedig wrth yrru'r car, mae'n ysgogi i yrru yn gynt. Wrth symud ymlaen at yr ail gân sef 'Cerdded', teimlaf fod yr elfen naturiol o'r perfformwyr yn cael ei golli yn y gân. Credaf fod y lleisiwr o dan staen ac yn y drydedd gân cawn steil arall yr 'heavy metal' gyda'r gitâr fas a'r drwm yn amlwg iawn. Mae'r unawd gyda'r gitâr flaen yn effeithiol ac yn gweddu i'r dull yma o ganu.
Wrth i mi wrando ar y gryno ddisg, cerddodd mam i mewn i'r ystafell. Mae mam yn teimlo bod llawer o ddylanwad y saithdegau (cyn fy amser i!) yn enwedig ar yr ail gân yn ymdebygu i ddull y 'Rolling Stones.'
Wrth gloi, un peth sy'n amlwg yw bod y canwr yn medru canu mewn tiwn, a bod yr offerynwyr wedi eu trwytho yn gelfydd yn yr offerynnau. Mae hyn yn amlwg wrth wrando ar y gryno ddisg. Un siom sydd nad oes mwy o ganeuon ar y CD. O'r ychydig rai gwelwn fod ystod eang o dalent i fedru perfformio gwahanol ddulliau o gerddoriaeth ysgafn. Byddaf yn edrych ymlaen yn eiddgar at y CD nesaf, gan obeithio y bydd yn cynnwys mwy o ganeuon ac efallai albwm yn nes ymlaen.
Gobeithio wedi'r holl waith caled ac ennill cystadleuaeth 'Brwydr y Bandiau' Mentrau Iaith Cymru a C2 91Èȱ¬ Radio Cymru mae dechrau'r daith fydd hyn i Coda, ac nid y diwedd. Felly, gydag ychydig o lwc medrwn edrych ymlaen am sawl blwyddyn o ddatblygiad cerddorol gan Coda.
Adolygiad gan Dylan Davies.
Mwy am Coda
Darparwyd yr erthygl hon i wefan Lleol fel rhan o gynllun Cyfrannu ar y cyd rhwng 91Èȱ¬ Cymru'r Byd ac Antur Teifi. Am fwy o fanylion sut fedrwch chi gael £30 am ysgrifennu - cliciwch yma.
Ìý
