91Èȱ¬

Thuirt manaidsear Chaley Thistle Inbhir Nis gu bheil dùil gum falbh tòrr obraichean aig a' chluba is iad air a dhol ann an rianachd.

Aig an dearbh àm ge-tà, tha Ailean Savage ag ràdh gu bheil esan misneachail gun gabh an cluba a shàbhaladh.

°Õ³óྱ²Ô¾±²µ dearbhadh Dimàirt gun deach a' chompanaidh BDO a stèidheachadh mar luchd-rianachd air ICT.

Tha dùil ri fios bhuapasan Diardaoin mun t-slighe air adhart.

"Gu follaiseach tha gearraidhean gu bhith ann, an sgioba choidsidh, cluicheadairean is luchd-obrach eile," thuirt Donnchadh Fearghasdan.

"Chan eil faireachdainn math mun cuairt air an àite.

"Chaidh innse dhuinn gur ann a-màireach a chluinneas sinn gu bheil tòrr obraichean gus falbh."

Tha ICT cuideachd air 15 puingean a chall mar pheanas airson a dhol ann an rianachd, gam fàgail aig bonn Lìog 1.

Thuirt Fearghasdan gu bheil e fhathast den bheachd gun urrainn dhaibh fuireach san lìog ach gum bi seo a rèir dè na gearraidhean a bhios ann.

Thuirt e cuideachd gun robh esan an aghaidh rianachd bho thùs is gu bheil a' creidsinn gur e mearachd a th' ann.

Bha Ailean Savage, a bha uair na chathraiche air ICT is a thill dhan chluba as t-samhradh mar fhear-comhairlichidh, air innse ron seo gun robh e den bheachd gur dòcha gur e rianachd an roghainn a b' fheàrr a bhith air fhàgail.

Dh'innis e don BhBC gun dèan e a dhìcheall an cluba a chumail a' dol.

Nuair a chaidh faighneachd dha an robh e misneachail gun gabh ICT a shàbhaladh, thuirt Mgr Savage: "Tha gu dearbh".

Gheall e cuideachd taic a thoirt do dhuine sam bith a chailleas an cosnadh obair ùr a lorg.

Cha chanadh Mgr Savage dè dìreach an t-àite a dh'fhaodadh a bhith aige fhèin aig Caley Thistle ma thig iad a-mach à rianachd.

"Tha sinn a' dol ceum le ceum is gus an dèan sinn sin tha e ro thràth a ràdh," thuirt e.