91Èȱ¬

Tha luaidh ga dhèanamh air fear de chluicheadairean òga aig Cluba Camanachd Chinn a' Ghiùthsaich, Calum Mac an Tòisich.

Chaochail e gu h-obann ann an Dùn Èideann air an deireadh-sheachdain aois 19.

Dh'innis an cluba gur e trioblaid cridhe a thug bàs dha.

Bha Calum na phàirt den sgioba a bhuannaich Cupa na Camanachd san t-Sultain.

Rugadh Calum Mac an Tòisich sa Mhàrt 2004 is bha e na sgoilear aig Bun-sgoil Drochaid Chàrr is Sgoil Ghràmair Bhaile nan Granndach.

Chluich e iomain do Cheann a' Ghiùthsaich aig ìre òigridh, is bha seusan aige le Srath Spè mus do thill e do Cheann a' Ghiùthsaich toiseach an t-seusain seo.

Ged nach robh e ach 19, fhuair e àite sa chiad sgioba - le tadhal ann an cuairt dheireannach Chupa MhicAmhlaidh, a' cluich cuideachd ann an cuairt dheireannach Chupa na Camanachd, is a' faighinn bhonn cuideachd 'son Cupa MhicThàmhais is a' Phrìomh Lìog a bhuannachadh.

Bha coidsichean Chinn a' Ghiùthsaich air a bhòtadh mar chluicheadair òg na bliadhna.

Dh'innis an cluba oidhche Dhòmhnaich gun do chaochail Calum ann an Dùn Èideann air an deireadh-sheachdain is iad ag ràdh gun tàinig trioblaid cridhe uabhasach air.

Thuirt an cluba gur e call a th' ann dhaibh nach gabh tuigsinn, is gu bheil an smuaintean leis an teaghlach.