An urrainn do dh'Alba an iomairt aca ann an Lìg nan Nàiseanan a shàbhaladh?
- Air fhoillseachadh
Cluichidh Alba an aghaidh na h-Òlaind oidhche Mhàirt
Tha na h-Albannaich aig bonn na buidhne aca ann an Lìg nan Nàiseanan ach a bheil dòchas ann fhathast dhaibh letheach slighe a-steach dhan iomairt?
Sin a' cheist agus le dìreach aon phuing às dèidh trì geamaichean sa bhuidhinn aca, dh'fhaodadh tu ràdh gur e dùbhlan a bhios ann dhaibh ma tha iad airson faighinn far bonn chùisean.
A dh'aindeoin geama teann an aghaidh Shasainn far an do chaill iad 2-1 agus puing fhaighinn an aghaidh na Beilge, bha 's dòcha dòchas a' fàs am measg an luchd-taic aig Alba.
An uair sin, chluich iad an aghaidh na h-Òlaind.
Chaill Alba 4-0 an aghaidh na h-Òlaind aig an Goffertstadion
Cha bhiodh e reusanta idir do dhuine sam bith sa scuad Albannach sùileachadh gum faigh iad puing sam bith às an treasamh geama aca ann am buidheann A1 an aghaidh nan Duitseach.
Chaill boireannaich na h-Òlaind a-mach ann an cairteal chuairt dheireannach Cupa na Cruinne 2023 an aghaidh na Spàinn - an dùthaich a thog an cupa aig a' cheann thall.
Chrìochnaich iad san treasamh àite aig Farpais na h-Euros 2022 bliadhna ron a sin - còig bliadhna às dèidh dhaibh an fharpais a bhuannachadh.
Beàrn eatorra
Mar sin, abair dùbhlan a bh' ann do dh'Alba. Rinn an geama Dihaoine an aghaidh na h-Òlaind follaiseach gu bheil beàrn mhòr ann fhathast eadar iad fhèin agus na dùthchannan eile a tha tric an sàs sna farpaisean mòra.
Mar a thuirt an cluicheadair aca, Lisa Evans, "b' e leasan a bha siud", às dèidh dhaibh call 4-0 le dìreach dà oidhirp air targaid agus 33% dhen bhall a chumail.
Cead do stuth Twitter?
Tha stuth Twitter an cois an artaigil seo. Tha sinn a’ sireadh cead bhuat mus tèid sìon luchdachadh, oir dh’fhaodadh iad ‘briosgaidean’ agus teicneòlas eile a chur an sàs. ‘S dòcha gum biodh tu airson a leughadh agus mus tèid thu air adhart. Airson sùil a thoirt air an stuth seo, tagh ‘Gabh ris agus lean ort’.
Tha fios gu bheil Pedro Martínez Losa air a bhith ag obair trang a' feuchainn ris an sgioba aige a thogail uair eile anns na làithean às dèidh làimhe.
Bidh aca ri dèiligeadh le stoirm nan Duitseach airson an dàrna turas taobh a-staigh ceithir latha oidhche Mhàirt.
Ach an turas seo, bidh Pàirce Hampden air cùlaibh nan Albannach.
Tha Erin Cuthbert fut gu leòr airson cluich
Agus tha dearbhadh ann a-nis gum bi aon de na cluicheadairean as cudromaiche aca, Erin Cuthbert, fut airson cluich às dèidh dhi a bhith air a goirteachadh airson a' gheama mu dheireadh.
A bharrachd air a bhith a' cruthachadh chothroman dhan sgioba aice, tha i air barrachd na 20 tadhal a chur do dh'Alba thairis air 61 ceap.
Cead do stuth Twitter?
Tha stuth Twitter an cois an artaigil seo. Tha sinn a’ sireadh cead bhuat mus tèid sìon luchdachadh, oir dh’fhaodadh iad ‘briosgaidean’ agus teicneòlas eile a chur an sàs. ‘S dòcha gum biodh tu airson a leughadh agus mus tèid thu air adhart. Airson sùil a thoirt air an stuth seo, tagh ‘Gabh ris agus lean ort’.
Aon chothrom eile
Le trì puingean, tionndadhaidh cùisean air a' cheann do dh'Alba oidhche Mhàirt.
Bhiodh siud a' fàgail dà gheama cho cudromach sa ghabhas sa bhuidhinn an aghaidh Na Beilge agus Shasainn agus bhiodh rud beag a bharrachd dòchais aca.
Chuir Pedro Martínez Losa an t-ainm aige ri cùmhnant ùr san t-Sultain, ga chumail aig Pàirce Hampden gu 2027
Le dìreach puing no gun phuing sam bith, fàsaidh cùisean nearbhach le dragh ann gun tuit iad sìos far na buidhne A1.
Agus le na h-Albannaich air call a-mach air àite aig an dà fharpais mu dheireadh aig Cupa na Cruinne agus Farpais na h-Euros, 's dòcha gun nochd ceistean mu dhreuchd a' mhanaidsear Pedro Martínez Losa.
Bidh an geama ri fhaicinn beò air 91ȱ Alba oidhche Mhàirt leis a' phrògram a' tòiseachadh aig 19:30.