91Èȱ¬

Thàinig urraman a bharrachd do Cheann Loch Seile is sianar bhon chluba air an taghadh ann an sgioba iomain na bliadhna 'son 2021.

Bha seusan eachraidheil aig an sgioba Aillseach is iad a' togail Cupa na Camanachd 'son a' chiad uair.

Beagan is 20 bliadhna bho rinn iad co-dhùnadh a dhol sìos na lìogaichean sa cheann a tuath is iad ann an staing, ràinig Ceann Loch Seile mullach na h-iomain san t-Sultain le buaidh 3-1 air Lòbhat san Òban.

Is ma bha ceist fhathast ann cò an sgioba a b' fheàrr a bh' ann an-uiridh, rinn Ceann Loch Seile an uairsin an gnothach air Ceann a' Ghiùthsaich gus Cupa MhicThàmhais a bhuannachadh 'son a' chiad turais.

Tha an soirbheachas sin a-nise ri fhaicinn ann an sgioba na bliadhna. Chaidh an sgioba a thaghadh às dèidh iomairt air-loidhne bho Chomann na Camanachd.

Chaidh iarraidh air sgiobairean cluicheadairean (bho chlubaichean eile) a chur air adhart 'son gach àite air a' phàirc.

Rinn luchd-taic an uairsin taghadh air Twitter is còrr is 3,500 bhòt ann.

Tha sianar bho Cheann Loch Seile san sgioba air a' cheann thall, barrachd na cluba sam bith eile.

Bha deagh sheusan aig a' Mhanaichainn cuideachd is dòchas mòr san sgìre gu bheil cluicheadairean a th' air soirbheachadh aig ìre òigridh a-nise gus tighinn gu ìre.

Mar thoradh air sin, chaidh Griogair MacCormaig agus Niall MacIllinnein bhon Mhanachainn ainmeachadh mar mhanaidsearan na bliadhna.

Tha adhbhar pròis eile aig a' Mhanachainn is dithis de na cluicheadairean a tha air an taghadh fo bhratach Cheann Loch Seile - Josh Grannd is Conor Cormack - air cluich leis a' Mhanachainn bho thùs.

Tha an sgioba mar a leanas:

Josh Grannd - Ceann Loch Seile

Fionnlagh MacRath - Ceann Loch Seile

Daniel Sloss - Camanachd an Ã’bain

Andy King - Caol Bhòid

Conor Cormack - Ceann Loch Seile

Steaphan Dòmhnallach - Baile Ùr an t-Slèibh

Ross MacRath - Caol Bhòid

Dòmhnall Nixon - Ceann Loch Seile

Ruairidh MacAnndrais - Ceann a' Ghiùthsaich

Jordan Friseal - Ceann Loch Seile

Seumas Falconer - Ceann a' Ghiùthsaich

Cè MacRath - Ceann Loch Seile

Manaidsearan: Griogair MacCormaig agus Niall MacIllinnein - A' Mhanachainn