91�ȱ�

Thòisich 24 sgioba ann an co-fharpais EURO 2020. Às dèidh 44 geama agus 123 tadhail, chan eil ach ochd sgiobaidhean air fhàgail a-nis.

Tha cuid de dh'fhuamhairean ball-coise na Roinn-Eòrpa air a bhith air an cur a-mach às a' cho-fharpais nas tràithe na bhiodh iad an dòchas, agus cuid de sgiobaidhean eile air tighinn troimhe ged nach tug mòran cus cothrom dhaibh sin a dhèanamh.

Nuair a bhios na geamannan anns na cairteal-chuairtean deireannach air an cluich Dihaoine agus Disathairne ge-tà, cha bhi ach dà gheama eadar na sgiobaidhean a tha fhathast anns a' cho-fharpais agus àite anns a' chuairt dheireannaich aig Wembley.

Cluichidh an Eilbheis an aghaidh na Spàinne anns a' chiad gheama feasgar Dihaoine. Bha an Eilbheis ann an suidheachadh cugallach anns a' bhuidhinn aca mun do chuir iad trì tadhail seachad air an Tuirc. 'S iadsan a dh'adhbhraich a' chrith-thalmhainn as motha den cho-fharpais thuige seo anns an ath chuairt, agus gillean Vladimir Petković a' cur nam Frangach a-mach le breaban-peanais.

Aig aghaidh na sgioba sheall Haris Seferović agus Mario Gavranović cho cunnartach 's a tha iad an aghaidh nam Frangach. Cuiridh Xherdan Shaqiri taic ris na h-oidhirpean acasan aig aghaidh na sgioba.

Chan eil an Spàinn air coimhead mar gu bheil iad aig ìre nan sgiobaidhean a bhuannaich tiotail eadar-nàiseanta dhaibh eadar 2008 agus 2012 fhathast, ach tha iad a' tarraing ghunnaichean mòra aig a' cho-fharpais seo.

Chuir iad còig seachad air Croàisia anns a' chuairt mu dheireadh às dèidh buidhne anns nach do sheall sgioba Luis Enqrique gun robh mòran cuideim anns an loidhne aghaidh aca chun an treas geama aca nuair a chuir iad còig seachad air Slobhagia.

Bha na neartan sin ri am faicinn an aghaidh Croàisia cuideachd, agus bidh aig an leithid Álvaro Morata agus Ferran Torres ag amas an Eilbheis a chur fo uallach airson adhartas a dèanamh.

Nas anmoiche Dihaoine cluichidh dhà de na sgiobaidhean air a bheil mòran a' cur airgid air na h-Euros. Tha an dà chuid na Beilgich agus na h-Eadailtich air coimhead gu math làidir anns na geamannan aca thuige seo, le na Beilgich a' cur Portugail a-mach às a' chuairt mu dheireadh, leis na h-Azzurri a' cluich ann an dòigh fhosgailte agus tlachdmhor.

Gun teagamh, tha Romelo Lukaku air cur ris na neartan aige bhon a dh'fhàg e Old Trafford, ach tha esan air sealltainn aig na h-Euros dè an seòrsa cluicheadair a dh'fhaodadh a bhith ann aig Manchester United. Le tadhail dha fhèin a' dol le cluich làidir a tha a' fosgladh dhorsan dha sgioba, bidh aig na h-Eadailtaich ri chumail sàmhach.

Bha na h-Eadailtaich feumach air ùine a bharrachd airson an Ostair a chur a-mach às a' cho-fharpais, ach leis an sin sheall iad neart nan eanchainnean aca a bharrachd air na neartan a tha aca leis a' bhall.

Le Ciro Immobile agus Lorenzo Insigne a' cur nan tadhal do Roberto Mancini, tha an sgioba a' coimhead nas adhartaiche na tha tric ri fhaicinn bho sgiobaidhean Eadailteach aig farpaisean mòra.

A bheil gu leòr ann an sin airson a' chiad thiotal eadar-nàiseanta a thoirt air ais dhan Eadailt bho na Euros ann an 2012? Bidh an geama an aghaidh na Beilge na dheagh chomharra dheth sin.

Disathairne tachraidh Poblachd nan Seiceach agus an Danmhairc. Tha luchd-taic nan Dànach ann an Copenhagen air còrdadh ri mòran, ach tha iasdan gu bhith gu math fada air falbh bhon gheama seo ann an Baku.

Tha Patrick Schick aig Poblachd nan Seiceach a-nis air ceithir tadhail fhaighinn aig na h-Euros, le esan feumach air aonan eile airson an aon àireamh fhaighinn 's a fhuair Milan Baroš ann an 2004 - nuair a fhuair a dhùthaich dha na h-iar-chuairtean deireannach.

An urrainn dha na Seicich sin a dhèanamh a-rithist? Sheall Schick agus an leithid Tomáš Holeš agus Tomáš Souček an aghaidh nan Duitseach anns a' chuairt mu dheireadh gur e seo sgioba as urrainn fuamhairean a chur a-mach.

Bhuannaich na Dànaich na farpaisean Eòrpach ann an 1992 ann an sgeulachd iongantaich, agus tha sgioba an là an-diugh air tighinn còmhla ann an dòigh gu math cumhachdach às dèidh mar a ghabh Christian Eriksen grèim-cridhe anns a' chiad gheama aca anns a' cho-fharpais.

Seo sgioba làn lùths gu dearbha, ach làn tàlant cuideachd. Chuir iad na Cuimrich tro oidhche gu math doirbh anns a' chuairt mu dheireadh agus iad a' cur ceithir tadhail seachad air sgioba Rob Page.

Fhuair Kasper Dolberg dà tadhail anns a' gheama sin, le Joakim Mæhle agus Martin Braithwaite a' cur ris an sin. Seo cluicheadairean a tha ann an sunnd, agus aig an àm cheart.

Chun a' gheama mu dheireadh den chuairt: An Ugràin an aghaidh Shasainn. Chan eil an Ugràin air a' chùis a dhèanamh air Sasainn ach aon turas, ach ma gheibh cluicheadairean na dùthcha seachad air blàr an aghaidh nan Suaineach anns a' chuairt mu dheireadh, tha cluicheadairean aca as urrainn cron a dhèanamh an aghaidh Shasainn.

Tha Oleksandr Zinchenko agus Andriy Yarmolenko gu tric a' cluich còmhla ri agus an aghaidh mòran de na Sasannaich ann am Prìomh Lìog Shasainn. Bidh iadsan - agus am manaidsear Andriy Shevchenko - ag amas air an Ugràin a thoirt dha na h-iar-chuairtean deireannach de na h-Euros airson a' chiad uair…agus còrdaidh e riuthe gu bheil aire mhòran gu bhith air Sasainn.

Agus dè mu dheidhinn Shasainn? Seo an aon aon gheama a tha gu bhith aca aig na h-Euros air falbh bho Wembley. Tha Sasainn ann an deagh shunnd cuideachd às dèidh dhaibh tighinn seachad air na Gearmailtich anns a' chuairt mu dheireadh.

A dh'aindeoin teagamhan mu shlàinte, tha Raheem Sterling air nochdadh ann an dòigh gu math follaiseach aig na farpaisean seo. Bidh cuid ag iarraidh Jack Grealish fhaicinn a' cluich bho thoiseach a' gheama cuideachd, ach an èist manaidsear na sgioba Gareth Southgate ri spiorad an luchd-taice neo ri eanchainn a tha air an sgioba a thoirt chun na h-ìre seo?

Spiorad agus eanchainn. Dà rud a tha air na h-ochd sgiobaidhean a thoirt cho fada mar thà. Tha iad gu bhith feumach air tuilleadh den dà rud a tha sin airson tighinn nas fhaide builleach.