91Èȱ¬

A Dhòmhnaill Chòir,

Bha Ruairidh airson 's gun sgrìobhainn thugad agus beagan innse dhut mu na tha dol aige fhèin na làithean-sa. Bidh e seachd Disathairne, mar a tha fhios agad. Thuirt mi ris gum biodh tu duilich nach biodh tu ann a-rithist am-bliadhna. ’S e gille laghach, èasgaidh a th' ann na làithean-sa, caran coltach riut fhèin, daonnan deònach taic is cuideachadh a thoirt dhuinn uile. Chan eil a’ ghruag idir cho bàn is a b’ àbhaist dhi bhith agus tha e nas àirde na bhiodh tu an dùil son gille cho òg.

Thadhail Calum Eàirdsidh oirnn an latha roimhe. Dh’iarr Ruairidh stiùireadh a thoirt dha air an fheadan. Bha Calum Eàirdsidh gu math foighidneach leis agus chòrd e rium a bhith ag èisteachd riutha. Tha Ruairidh air a bhith a’ cluich an fheadain gu dìcheallach gach latha. Tha e airson 's gun tadhail sinn air Calum Eàirdsidh a-màireach agus rudeigin eile ionnsachadh. Bidh e fada nas fhasa nuair a thilleas tu fhèin is gun tèid agad air ionnsachadh thu fhèin. Ach co-dhiù, tha sinn uile toilichte gu bheil ùidh aige ann an ceòl na pìoba. Bidh e math pìobaire eile a bhith againn san teaghlach.

Thug mi sìos dhan a’ bhàgh e an-dè, is mi a’ feuchainn ri snàmh ionnsachadh dha mar a dh’ionnsaich thu fhèin dhomh. Chan eil an cothrom tric againn eadar an droch shìde agus cho trang ’s a tha mi fhèin. Tha mi an dòchas gum bi e cofhurtail snàmh air ais is air n-aghaidh ro dheireadh an t-samhraidh ach chì sinn mar a thèid leis. Cumaidh sin sàbhailt’ e. Dh’iarr e orm innse dhut gun còrdadh e ris snàmh còmhla riut nuair a thilleas tu.

Tuigidh e beagan mun chogadh a-nis agus ceistean gu leòr aige mun ghnothach. Cuid mhath dhiubh sin nach tèid am freagairt. Bidh mi a’ seachnadh bruidhinn mun chogadh ro thric leis. Le gach naidheachd a thig on chogadh, tha fìrinn ur suidheachadh a’ tighinn am bàrr mean air mhean. Cha chreid mi gum biodh e freagarrach dha làn thuigse fhaighinn air cho duilich ’s a tha cùisean.

Feumaidh mi ràdh gu bheil mi gad ionndrainn gu mòr. Bha thu daonnan deònach èisteachd rium nuair a bha iomagain orm agus bha deagh chomhairle a-riamh agad.

Tha sinn uile an dùil gum bi an teaghlach air fad cruinn còmhla ann an ùine nach bi ro fhada.

Bhiodh e math cluinntinn bhuat ma thig an cothrom.

Chun an latha a bhios sinn còmhla, gach beannachd ort.