Gluaisidh Caley Thistle Inbhir Nis an trèanadh aca a Fìobha

Tùs an deilbh, SNS

Dh'innis Caley Thistle Inbhir Nis gun gluais iad an trèanadh aca a Fìobha, mar phàirt de dh'ath-thogail a tha iad a' toirt air a' chluba.

Tha iad air aonta a dhèanamh le Kelty Hearts.

Chaidh ICT a chur sìos a Lìog a h-Aon an t-seachdain a chaidh às dèidh dhaibh am play-off an aghaidh Hamaltan a chall.

Thuirt iad gur e a' Phàirc Chailleannach fhathast an dachaigh.

Tha iad ag ràdh gu bheil goireasan air leth aig Kelty Hearts, a tha cuideachd ann an Lìog a h-Aon.

Thuirt ICT gu bheil pàirc 3G aca, pàircean feòir agus oifisean dha na coidsichean.

Tha Caley Thistle ag ràdh gu bheil e air a bhith duilich dhaibh toirt air cluicheadairean gluasad chun na Gàidhealtachd, agus gu bheil prìsean àrda airson taighean mar phàirt dhen duilgheadas sin.

Bha an cluba ag ràdh gun cùm iad orra ag obrachadh le òigridh air a' Ghàidhealtachd agus gur e Inbhir Nis an dachaigh a bhios aca gu bràth.