91Èȱ¬

Thuirt caiptean ùr sgioba iomain na h-Alba gu bheil e cudromach gun cluich iad an geama aca fhèin sa gheama eadar-nàiseanta ann an Èirinn Disathairne.

Thèid Alba an aghaidh sgioba iománaíochta na h-Èireann aig Páirc Uí Chíosóg an Contae an Chláir.

Tha iad a' sireadh dìoghaltais às dèidh mar a rinn na h-Èireannaich an gnothach orra 0-22 (22) gu 2-8 (14) an-uiridh.

'B e sin a' chiad turas a bha iad air buannachadh ann an grunn bhliadhnaichean.

Tha na h-Èireannaich a-rithist air measgachadh de chluicheadairean a thaghadh à diofar ìrean na spòrs, ach tha cuid dhiubh a' tighinn às na prìomh sgiobaidhean.

Tha Robert Mabon à Ceann a' Ghiùthsaich ag ràdh gur e urram fìor mhòr a th' ann dha a bhith na sgiobair air Alba 'son a' chiad turas.

Thuirt Mabon gu bheil fios aig na h-Albannaich gu bheil geama doirbh romhpa.

"Tha sinn mothachail nach eil iad cho buailteach feuchainn air an tadhal, tha iad riaraichte am ball a chur thairis air a' bhàr is puing fhaighinn.

"Mar sin tha e cudromach aig a' chùl gum bi sinn teann riutha is nach toir sinn dhaibh rùm.

"Aig an aghaidh bidh sinn ag amas air am ball fhaighinn sìos air an talamh is iomain a chluich.

"Feumaidh sinn na cothroman air puingean a ghabhail cuideachd nuair a tha iad ann," thuirt e.

A' bruidhinn air Aithris na Maidne Dihaoine, thuirt Ceit Bradley gu bheil i den bheachd gu bheil Alba air a thaghadh.

Chuir i fàilte gu sònraichte air Lachie Seathach às a' Ghearasdan a tha a' tighinn a-steach dhan sgioba 'son a' chiad turas.

"Uaireanan le cothrom cluich aig ìre Fo 21 chan eil iad a' toirt ach cluicheadairean beagan nas sine (dhan phrìomh sgioba) is tha sinn a' call luaths a tha a' tighinn le cluicheadairean beagan nas òige.

"Tha Lachie Seathach gu math cunnartach air beulaibh an tadhail is tha mi a' smaoineachadh gu bheil mar a tha sinn a' measgachadh eadar cluicheadairean le eòlas a tha air a bhith an sàs tric - mar Steafan Dòmhnallach à Baile Ùr an t-Slèibh is Stiùbhart Dòmhnallach à Lobhat - is cluicheadairean ùra mar Lachie Seathach, tha mi a' smaoineachadh gur e measgachadh math a tha sin," thuirt i.

Bidh an geama beò Disathairne air bho 3:25f.