91Èȱ¬

Tha ceistean a' leantainn mu Chupa Eilean an Fhraoich is dùil gun dèan am Bac ath-thagradh an aghaidh a' cho-dhùnaidh an tilgeil a-mach às an fharpais.

Bha am Bac ann an suidheachadh glè làidir is iad air an gnothach a dhèanamh air na Hearadh 4-0 sa chiad gheama den iar-chuairt dheireannaich air an 22na den Iuchar.

Nochd ceist às dèidh sin an robh cead aig fear de na cluicheadairean aca a bhith a' cluich sa gheama.

Chuala coinneamh de Chomataidh Comann Ball-coise Leòdhais is na Hearadh an t-seachdain seo nach deach na pàipearan ceart airson Màrtainn MacIlleathain a chlàradh a chur a-steach chun an 29mh den Iuchar, seachd là às dèidh dhan gheama a bhith ann.

Chuala a' choinneamh gun robh na pàipearan ceàrr a chaidh a chur a-steach an toiseach fhathast a' sealltainn air an 27mh den Iuchar nach robh an cluicheadair air a chlàradh mar a bha còir.

Fhuair a' chomataidh mar sin gun robh Mgr MacIlleathain fhathast air a chlàradh mar chluicheadair phroifeiseanta air an 22na den Iuchar is nach robh còir aige a bhith air cluich an aghaidh na Hearadh.

Ach ged a chaidh am Bac a chur a-mach às an fharpais, tha cothrom aca ath-thagradh a dhèanamh is dùil a-nise gur e sin a thacras.

'S e Dimàirt an 20mh den Lùnastal an ceann-là a th' aca airson ath-thagradh a chur air adhart.

Tha seo a' fàgail gu bheil na h-uimhir de mhì-chinnt ann fhathast an e na Hearadh no am Bac a chluicheas an aghaidh an Taobh Siar sa chuairt dheireannaich.

'S e na Hearadh an aghaidh an Taobh Siar a bh' ann sa chuairt dheireannaich de Chupa a' Cho-op oidhche Haoine ach chan eil sin seachad nas motha.

Air a' cheann thall stad an geama le beagan is uair a thìde air a cluich is a' phàirc aig Cnoc nan Gobhar na boglach.

Bha na Hearaich 2-0 air thoiseach aig an àm is an Taobh Siar sìos gu deichnear.

A dh'aindeoin gach oidhirp gus a' phàirc a chur air dòigh chaidh an geama a chur dheth.

Briseadh-dùil mòr dha na Hearadh gu h-àraidh is seo a' chiad chuairt dheireannach aca ann an 13 bliadhna, ach bidh aig na sgiobaidhean a-nise ri coinneachadh a-rithist.

Bidh an geama ann Disathairne an 31mh den Lùnastal ann an Garrabost aig 6.00f.

Tha iad a' dèanamh gàirdeachais ann am Barraigh ge-tà, is an sgioba air Lìog Uibhist is Bharraigh a bhuannachadh.

Chaidh sin a dhearbhadh oidhche Dhiardaoin nuair nach do rinn Saints an Iochdair an gnothach air Uibhist a Tuath.

Tha Barraigh a-nise air an lìog a bhuannachadh ceithir bliadhna ann an sreath.