91Èȱ¬

Dh'innis an leabhar ainmeil The Hitchhiker's Guide to the Galaxy le Dùghlas Adams gur e 42 freagairt ceist na beatha, na Cruinne agus a h-uile sìon.

'S e an trioblaid, a rèir an leabhair, nach robh fios aig duine beò dè dìreach a bha sa cheist fhèin.

Tha sgioba ball-coise Brechin City air fàs tuilleadh 's a' chòrr eòlach air 42 thairis air a' bhliadhna mu dheireadh.

Ann am ball-coise na h-Alba 's e tha 42 a' ciallachadh ach bonn Lìog 2 agus geama play-off le cunnart tuiteam às an SPFL uile gu lèir.

Connspaid

Chan e mar sin obrachadh a-mach dè th' ann an ceist na beatha a tha a' dèanamh dragh do Bhrechin, ach mar a thèid aca air tuiteam gu Lìog na Gàidhealtachd a sheachnadh. Adhbhar a' bhàis a rèir cuid ann am Machair Aonghais tha e coltach.

Agus 's e sin a tha air Brechin City a chur aig teis mheadhan connspaid a tha a' togail cheistean mu shiostam pioramaid ball-coise na h-Alba.

Tha Brechin air tuiteam mar chlach anns na bliadhnaichean mu dheireadh. Sìos bhon Championship tro Lìog 1 is an uairsin gu bonn Lìog 2.

B' ann aig grunnd a' phoidhle a bha iad nuair a chuir Covid-19 stad air ball-coise sa Mhàrt 2020. Leis gur e àite play-off a bha sin is an SPFL air a' cheann thall a' co-dhùnadh nach biodh geamaichean play-off sam bith ann, chaidh Brechin a shàbhaladh.

Bha gearainean gu leòr ann is co-fhaireachdainn dha na sgiobaidhean a bhuannaich Lìog na Gàidhealtachd is Lìog na Galltachd, Brora Rangers is Kelty Hearts, nach d' fhuair cothrom farpais ri Brechin 'son àite ann an Lìog 2.

Ach bha tuigse ann cuideachd nach deach dèiligeadh ri Brechin ann an dòigh dhiofraichte bho sgioba sam bith eile san SPFL.

Chan ionnan 2020 is 2021.

Tha Brechin air ais aig bonn a' phoidhle is tha Lìog na Gàidhealtachd is Lìog na Galltachd air Brùra is Kelty a chur air adhart mar na tagraichean aca 'son geamaichean play-off.

Ceartas

Ged nach deach aca air làn-sheusan a chluich - gu dearbha cha do chluich Brùra ach trì geamaichean - tha cuid den bheachd gur e ceartas a bha seo leis mar a chaill an dà sgioba a-mach ann am 2020.

Tha Kelty is Brùra ag ràdh gu bheil iad deiseil is deònach na geamaichean play-off a chluich.

Ach tha Brechin air draghan a thogail a tha air an ceòl a chur air feadh na fìdhle.

Ann am air-loidhne, thuirt an cluba gum biodh geamaichean play-off am-bliadhna "gu bunaiteach mì-chothromach air Club 42".

Thàinig orra tòrr gheamaichean a chluich ann an ùine ghoirid, tha iad ag ràdh, rud a bheireadh cothrom nas fheàrr dhan sgioba a bhuannaicheas eadar Kelty is Brùra nach bi ach air dà gheama a chluich.

'S e tha Brechin a' moladh nach tèid iadsan sìos idir, is gun tig Kelty is Brùra ri chèile dìreach suas gu Lìog 2 nas motha.

Thathas cuideachd a' tuigsinn gu bheil Brechin a' moladh gun tigeadh dà sgioba eile suas an ath-bhliadhna, is an uairsin sgiobaidhean òigridh Celtic is Rangers a' bhliadhna às dèidh sin gus Lìog 2 de 16 sgiobaidhean a chruthachadh air a' cheann thall.

'S dòcha gur e dha-rìribh cothromachd is cruth nas fheàrr dhan a h-uile duine a tha Brechin ag iarraidh.

¶Ùì³¾±ð²¹²õ

Ach leis a' bheachd a' nochdadh aig an ìre seo, 's beag an t-iongnadh gu bheil cuid a' faicinn seo mar oidhirp rudeigin carach air àite san SPFL a ghlèidheadh tro dhioplòmasaidh seach ball-coise.

'Maslach is nàir'. 'A' dèanamh dìmeas air farpais'. 'A' cur an t-suidheachaidh aca fhèin air thoiseach air na tha math dha clubaichean eile is an spòrs san fharsaingeachd'.

Sin dìreach cuid de na beachdan a nochd air na meadhanan-sòisealta an t-seachdain seo mu Bhrechin City, seach Super League na h-Eòrpa.

'S e tàmailt a tha sin mu chluba a tha air a bhith cho fada ann an Lìog na h-Alba is tha air urram is meas a chosnadh airson cho math 's a rinn iad leis na bh' aca, a thuilleadh air cho ainmeil gu h-eadar-nàiseanta 's a tha na callaidean ri taobh Pàirc na Glìb.

Tha a h-uile coltas ann a-nise nach tèid ball a bhreabadh gu sìorraidh buan san Super League, is gum feum fiù 's fuamhairean mòra na spòrs adhartas sam bith a nì iad a chosnadh san dòigh thraidiseanta.

Bidh gu leòr an dòchas mar an ceudna gum bi aig Brechin City - mar Real Madrid, Manchester United is an còrr - ris an t-suidheachadh aca a leasachadh san àite cheart.

Air a' phàirc fhèin.