91�ȱ�

Gallai'r cyfathrebu ynghylch newidiadau i'r taliad tanwydd gaeaf i bensiynwyr "fod wedi'u gwneud yn well", yn ôl AS Llafur Gŵyr.

Mae Llywodraeth y DU wedi dweud mai dim ond i'r rhai sy'n cael credyd pensiwn neu gymorth arall sy'n dibynnu ar brawf modd y bydd taliadau'n cael eu gwneud yn y dyfodol.

Mae'r cynlluniau wedi cael eu beirniadu gan rai ASau, undebau ac elusennau.

Fe ddaw wrth i’r Canghellor Rachel Reeves gyflwyno Cyllideb gyntaf Llafur ar Hydref 30ain.

Mae hi eisoes wedi rhybuddio y bydd yn golygu "penderfyniadau anodd" ar drethi, gwariant a budd-daliadau.

Mae'r Prif Weinidog Syr Keir Starmer wedi dweud wrth y 91�ȱ� y bydd y Gyllideb "anodd" yn "canolbwyntio ar ailadeiladu ein gwlad".

Wrth siarad ar raglen Sunday Supplement Radio Wales, dywedodd Tonia Antoniazzi - sydd hefyd yn gadeirydd Pwyllgor Dethol Materion Gogledd Iwerddon - y gallai cyfathrebu'r newidiadau fod wedi cael ei wneud yn wahanol.

"Gyda'r Lwfans Tanwydd Gaeaf, rydyn ni'n gwybod beth yw'r problemau gyda'r Taliad Cynhwysol. Rydyn ni'n gwybod bod yna lawer o bobl na fydd ei angen, ac efallai bod y rhai sydd ei angen yn colli allan."

“Mae wedi bod yn anodd, oherwydd rwy’n meddwl y gallai’r cyfathrebu fod wedi'i wneud yn well.”

Dywedodd Ms Antoniazzi hefyd ei bod yn "edrych ymlaen" at y Gyllideb, ac y byddai'n gyfle i "ailosod" i Gymru.

“Rwy’n credu bod Rishi Sunak yn gwybod pan alwodd yr Etholiad Cyffredinol faint o anhrefn yr oedd yn mynd i’w achosi.”

“Ychydig iawn o wythnosau a gawsom cyn Toriad yr Haf, a gafodd ei fyrhau, ac yna fe gawson ni bythefnos ac roedden ni ar doriad y gynhadledd.”

"Mae'r Gyllideb yn awr yn wir y tro cyntaf y gallwn ei ffitio i mewn. Ond, mae wedi bod yn anodd i ddelio â'r hyn y mae pobl yn cymryd sydd ar y gweill."

"Mae'n rhaid i Gymru a Llafur fod 100% yn well na lle'r ydym wedi bod yn y 14 mlynedd diwethaf."

“Rydw i mewn gwirionedd yn edrych ymlaen at y gyllideb hon, oherwydd rydw i eisiau gweld beth sy'n dod, a beth rydyn ni'n mynd i'w wneud, i ailosod y botwm.”