91�ȱ�

Bydd Gwilym Bowen Rhys yn beirniadu Brwydr y Bandiau Gwerin yn y Tŷ Gwerin am 15:30 gyda Lleuwen Steffan.

"Mi fydda i'n chwilio am wreiddioldeb, hyder a'r gallu i rannu mwynhad efo'r gynulleidfa," dywedodd.

Bydd Gwilym yn gigio yn Cwrw Llŷn heno - mae ganddo 19 gig i gyd yr wythnos hon! 😮🎶

Ewch draw i'n gwasanaeth Sedd yn y Pafiliwn er mwyn dal bob eiliad o'r cystadlu!

Ffynhonnell y llun, Aled Llywelyn/Eisteddfod

Mae’r gynulleidfa yng Nghymdeithasau 2 wedi cael y pleser o wrando ar rai o ganeuon gwerin Llŷn ac Eifionydd yng nghwmni Gwenan Gibbard y prynhawn yma.

Ar Lwyfan y Maes heno bydd cyfle i weld Band Pres Llareggub - ac yn y Pafiliwn Mawr, sioe 'Cracharela' Cabarela.

Ffynhonnell y llun, Aled Llywelyn

Wedi eu llwyddiant yn Nhregaron y llynedd mae’r criw doniol a ffraeth yn perfformio am ddwy noson – ac ydy mae’r tocynnau i gyd wedi’u gwerthu!

Fe gafodd Ffion Emyr sgwrs efo un o'r criw, Hywel Pitts, ar 91�ȱ� Radio Cymru...

Kitch n Sinc aeth ag Eisteddfodwyr ar fordaith oes o Bwllheli i'r Barri, gyda chriw cotiau cochion butlins yn y theatr stryd a dawns.

Mae’n 40 mlynedd ers sefydlu Gwobr Dysgwr y Flwyddyn ac unwaith eto eleni mae Maes D yn llawn bwrlwm.

Am 17:00 heno fe fydd rhai o ddigrifwyr amlycaf Cymru – yn eu plith Kiri Pritchard McLean – wrth y llyw.

Hwn fydd un o’r troeon cyntaf iddi berfformio set llawn yn y Gymraeg.

Ymhlith eraill a fydd yn perfformio mae Esyllt Sears, Kris Davies a Dai Rhys Towler.

Am 16:00 ger pabell S4C heddiw mae Pobol y Cwm yn mynd benben yn erbyn Rownd a Rownd mewn cwis arbennig.

Pwy fydd yn fuddugol yn y cwis rhwng y ddwy opera sebon eiconig?...

Dwy gyfnither, Eira o Drawsfynydd ac Isla o Wolverhampton, yn mwynhau reid gyda 'chartŵn byw' Gary & Pel.

Mae 91�ȱ� Cymru Fyw yn deall fod pabell wedi ei chau i ffwrdd ar Faes B.

Mae un o’r safleoedd yn y maes ieuenctid i weld wedi cael ei ffensio i ffwrdd.

Mae llwyfan agored arall wrthi’n gorffen cael ei godi ar y maes.

Er bod y cae gwersylla wedi agor erbyn 13:00, mae cannoedd o bobl wedi bod yn ciwio am oriau i gael mynediad yno.

Mae’r Eisteddfod wedi cael cais am ymateb.

Yn dilyn llwyddiant Brwydr y Bandiau, mae'r Eisteddfod Genedlaethol a 91�ȱ� Radio Cymru wedi lansio cystadleuaeth newydd - Brwydr y Bandiau Gwerin! 🎶

Y bwriad yw dilyn esiampl Brwydr y Bandiau drwy gynnig cyfle i ddatblygu artistiaid a chryfhau'r sîn werin ar gyfer y dyfodol.

Mae pedwar o artistiaid neu fandiau wedi cyrraedd y rhestr fer: Melda Lois, artist unigol sy'n wreiddiol o Gwm Croes, yn ardal Penllyn; Lo-Fi Jones, band o Fachynlleth a Chaerdydd; Y Brodyr Magee, grŵp teuluol o Ynys Môn, a Rhiannon, sy'n artist unigol o Ffarmers, Sir Gaerfyrddin.

Y beirniaid yw Lleuwen Steffan a Gwilym Bowen Rhys.

Ffynhonnell y llun, EISTEDDFOD GENEDLAETHOL

Bydd yr enillydd yn derbyn gwobr o £600 (£300, Clwb Gwerin y Castell, Cricieth, a £300 gan Hefina a Tomos, Tyddyn Cae, Boduan), ynghyd â sesiwn ar 91�ȱ� Radio Cymru.

Mae'r gystadleuaeth yn agored i grwpiau neu unigolion gyda'r rheini sydd wedi cyrraedd y rownd derfynol yn derbyn pecyn datblygu proffesiynol sy'n cynnwys recordio a ffilmio dwy gân mewn set byw.

Mae un o ganeuon pob artist neu fand bellach i'w gweld ar sianel YouTube yr Eisteddfod.

Cynhelir y rownd derfynol yn y Tŷ Gwerin am 15:30.

Nos Wener fe fydd Frân Wen yn llwyfannu'r cynhyrchiad theatrig gyntaf i'w chynnal ym Maes B.

Bydd 'Popeth ar y Ddaear' yn gwahodd cynulleidfa i gamu mewn i fyd yn y dyfodol agos ble mae trychineb catastroffig wedi boddi cymunedau.

Ac wrth i Maes B groesawu'r gwersyllwyr cyntaf heno 'ma, fe fydd rhai o'r cymeriadau wrthi'n crwydro yn eu plith...

Yn y Babell Lên am 14:30 fe fydd yna wynebau newydd yn Ymryson Barddas.

Bydd y Prifardd Twm Morys yn camu i esgidiau’r Meuryn wedi i Tudur Dylan Jones fod wrth y llyw am 20 mlynedd.

Yn camu i esgidiau Islwyn fe fydd Gruffudd Antur.

Y timau a fydd yn cystadlu y prynhawn ‘ma fydd Morgannwg, Deheubarth a Chaernarfon.

O straeon y byd gwleidyddol i ddigwyddiadau'r dydd ar y maes, mae Jennifer Jones ac Alun Thomas wrthi'n darlledu'n fyw ar 91�ȱ� Radio Cymru.

Eisiau clywed mwy am fyd y bêl gron?

Ewch draw i'r Sinemaes am 15:00 i glywed gan Sioned Dafydd, Dylan Ebenezer a Nic Parry ️⚽️

Ar stondin Prifysgol Bangor mae lansiad ymgyrch i geisio recriwtio mwy o fyfyrwyr meddygol i’r gogledd.

Mae Dr Nia Jones, arweinydd rhaglen feddygaeth Prifysgol Bangor, yn dweud fod y cyfnod diweddar gyda’r pandemig wedi dangos yr angen am feddygon.

Er bod cael lle ar gwrs yn “anodd a chystadleuol”, mae’n pwysleisio hefyd fod cael darpar fyfyrwyr sy’n siarad Cymraeg “yn bwysig i ni”.

Yna mae rhai o fyfyrwyr y brifysgol yn chwarae drwy senario ddychmygol o sut fydden nhw’n delio gyda chlaf oedd wedi ei daro’n wael ar y maes.

Mae Lleucu Bryn yn un o'r bobl ifanc sy'n wynebu oedi wrth fynd mewn i Faes B ar hyn o bryd.

"Mae'n ofnadwy o hwyr y agor ond gobeithio gewn ni fynd mewn yn fuan, ma' 'isio bach gwell trefn yma," dywedodd.

"Ma' 'na bobl yn cerdded heibio a jympio’r ciw a neb yn neud dim am y peth.

“Dyle bod o’n barod! Oedden ni fod mewn am 12:00 a 'den ni di bod yn ciwio ers tua tri chwarter awr 'wan.

"'Na i'm cyrraedd i wylio Elis Derby ar y maes am 14:00 ar y rât yma! Ond o leia' 'di hi ddim yn bwrw!”

... a'r cadeiriau campio'n cael digon o ddefnydd yn barod.

Ym Mhabell Cymdeithasau 2 mae Dewi Llwyd yn holi’r Fonesig Elan Closs Stephens, Cadeirydd Dros Dro y 91�ȱ�.

Fe ddechreuodd y cyflwynydd drwy nodi mai dyma’r tro cyntaf i gadeirydd y gorfforaeth gael ei holi ar faes yr Eisteddfod.

Wedi’r cwestiwn agoriadol am gyfnod cythryblus diweddar y 91�ȱ�, fe wnaeth y Fonesig Stephens gyfaddef ei bod wedi bod yn “fedydd tân” iddi yn y swydd.

Dywedodd ei bod hi’n teimlo fod y gorfforaeth wedi ymdrin â’r sefyllfa'n ymwneud â'r cyflwynydd Huw Edwards “gyda gofal a thegwch i bawb”.

Ychwanegodd ei bod hi’n debyg o gymryd “rhai misoedd” i’r ymchwiliad i’r mater gael ei gwblhau.

Mi oedd hi'n brysur ger Llwyfan y Maes neithiwr - a neb llai nag ennillydd a gwneuthurwr y Goron wrthi'n dathlu yn yr haul.