91Èȱ¬

Gyda bron i bedwar ymhob deg o dadau newydd yn poeni am eu hiechyd meddwl, mae yna ymdrechion i ddod â thadau at ei gilydd - i sgwrsio a mynd am dro.

Mae grŵp o'r fath eisoes wedi'i sefydlu ym Mhont-y-pŵl yn Nhorfaen ac wythnos nesaf fe fydd tadau ym Môn yn cael cyfle i gwrdd a dechrau cyd-gerdded hefyd.

Fe ddangosodd arolwg gan fenter gymdeithasol Dadpad fod 38% o dadau yn poeni am eu hiechyd meddwl ac maen nhw'n dweud y bydden nhw'n croesawu rhagor o gefnogaeth. 

Dywed Llywodraeth Cymru bod ymdrechion ar y gweill i gynnig mwy o gefnogaeth a gwybodaeth i dadau a phartneriaid.

Fe all cyfarfod â thadau eraill fod yn fuddiol iawn ym marn James Sutherland, un o drefnwyr Grŵp Tadau Môn, sydd hefyd yn swyddog gyda 91Èȱ¬start Cymru - mudiad sy'n hybu lles teuluoedd.

"Ar hyn o bryd mae 'na gymaint o falchder efo tadau, maen nhw i fod yn macho a phob dim... Dan ni isio cael dros hwnna a jyst cael allan, cael chat bach a dwi'n gwbod mae'n fwy haws jyst sefyll efo rhywun ochor yn ochor, ddim yn wynebu nhw a jyst mynd am dro a chael free flow chat am beth bynnag maen nhw isio siarad am," meddai.

Mae Uned Cefnogi Teuluoedd Môn yn gefnogol iawn o'r grŵp cerdded.

Cydlynydd Prosiect Braenaru'r Blynyddoedd Cynnar ar Gyngor Môn ydy Kimberley Coll ac meddai: "Dwi'n meddwl mai o wastad wedi bod yna [y straen] a dwi'n meddwl bod 'na sylw eithriadol rŵan yn cael ei roi a dwi'n cytuno y dyla 'na fod sylw ar hyn, a dwi'n meddwl wrth weithio efo'r teulu cyfan, dyna ydy'r best outcome i'r plentyn.

"Mae hynny'n ffaith ychwanegol, pobol yn gorfod mynd i'r gwaith yn fwy cynnar, felly mae 'na gymaint o ffactorau sydd yn gallu tarfu ar iechyd meddwl y tad neu'r fam, neu'r carer in general," ychwanegodd. 

Mi fydd mab James Sutherland yn naw oed dros y dyddiau nesaf, ac fel pob tad arall, mae wedi dysgu ar hyd y daith. 

"Dŵad â phlentyn bach i'r byd... mae'n galed eniwe ond mae 'na lwyth o betha'n mynd efo fo.

"Ar ôl y ddwy wythnos yn bod adra efo'r mab bach, a'r tadau'n gorfod mynd nôl i'r gwaith a gadael y fam i wneud pob dim.

"Felly mae hwnna'n mynd i effeithio massive impact ar Mam fanna. Felly mae'n bwysig i iechyd meddwl Mam hefyd.

"Felly dwi'n meddwl Dad yn mynd allan i'r gwaith, grêt mynd yn ôl ato fo, ond pwy sy'n siarad i Dad? Pwy sydd yn gofyn 'Are you OK?'"

Fe ddywedodd llefarydd ar ran Llywodraeth Cymru eu bod yn datblygu'r timau sy'n ymwneud â maes iechyd meddwl rhieni yn y cyfnod cyn ac ar ôl genedigaeth plentyn, ac mae yna ymdrech i gynnig mwy o gefnogaeth a gwybodaeth i dadau a phartneriaid.

Ychwanegodd eu bod wedi'u hymrwymo i wella'r gwasanaethau hynny ac y byddan nhw'n ystyried pa gamau pellach y bydd eu hangen.