91Èȱ¬

Mae disgwyl i deithwyr trenau wynebu trafferthion yn ystod y dyddiau nesaf wrth i aelodau undeb weithredu'n ddiwydiannol.

Bydd nifer o newidiadau i'r amserlen arferol rhwng dydd Mercher a dydd Sul, a dydd Mercher fydd dim un trên o gwmni Great Western Railway (GWR) yn teithio o dde Cymru i Loegr.

Dywedodd llefarydd ar ran cwmni GWR bod y streiciau yn "amharu" ar y trafodaethau ac "y byddai'n llawer gwell pe na fyddent yn digwydd".

Mae'r undebau mewn anghydfod gyda Llywodraeth y DU a chwmnïau trên.

Mae Network Rail, sydd berchen ac yn gweithredu'r rheilffyrdd, yn dweud bod angen eu moderneiddio ac maen nhw'n cynnig 8% o godiad cyflog i weithwyr yn ystod y ddwy flynedd nesaf.

Yn ôl ysgrifennydd cyffredinol undeb Aslef, Mick Whelan, mae cwmnïau trên yn dweud wrth "yrwyr trenau am gymryd gostyngiad yn eu cyflog".

"Gyda chwyddiant bellach yn 12.3% ac yn debygol o godi - mae'r cwmnïau yn dweud wrth yrwyr am weithio cyn galeted a chyn hired am dipyn llai o arian," meddai.

Mae disgwyl i deithwyr wynebu trafferthion ar y dyddiau canlynol:

Dydd Mercher, 5 Hydref

Yn sgil streic gan undeb Aslef fydd 'na ddim trenau GWR rhwng Cymru a Lloegr.

Mae Trafnidiaeth Cymru yn gweithredu amserlen arferol ond mae disgwyl trafferthion yn sgil y gweithredu ac maen nhw'n rhybuddio teithwyr rhai siwrneiau i deithio ond os oes rhaid - gan gynnwys y daith rhwng Caerfyrddin a Chasnewydd.

Mae disgwyl i'r teithiau trên rhwng Amwythig ac Wolverhampton, Caerdydd a Cheltenham a rhwng Caer a Chaergybi fod yn brysur.

Mae'r ffaith fod gorsaf Birmingham New Street ar gau yn golygu y bydd y gwasanaethau rhwng gogledd Cymru a Birmingham International yn dod i ben yn Wolverhampton.

Dydd Iau, 6 Hydref a Gwener, 7 Hydref

Bydd gweithredu diwydiannol gan undeb TSSA ddydd Iau hefyd yn cael effaith ar deithiau ddydd Gwener - ac ychydig iawn o wasanaethau GWR fydd yn weithredol.

Ddydd Iau bydd y trenau yn cychwyn am 07:30 ac yn gorffen am 19:00 - mae hynny yn cynnwys y teithiau o Paddington yn Llundain i Abertawe.

Mae Trafnidiaeth Cymru yn rhybuddio y byddant yn brysur iawn o ganlyniad.

Sadwrn, 8 Hydref

Ddydd Sadwrn bydd aelodau undeb yr RMT, yn eu plith signalwyr, ar streic.

Mae disgwyl i'r gweithredu effeithio ar nifer o wasanaethau gan fod gweithwyr Network Rail yn aelodau o'r undeb.

Bydd gwasanaethau cwmni GWR yn cychwyn am 07:30 ac yn gorffen cyn 18:30 - gwasanaeth cyfyngedig iawn fydd yna rhwng Llundain a Chaerdydd a rhwng Caerdydd a Chaerfaddon.

Mae Trafnidiaeth Cymru yn annog teithwyr i beidio teithio ar drên os yn bosib.

Dim ond rhai o drenau Cledrau'r Cymoedd fydd yn weithredol ac fe fydd un trên yn teithio rhwng Caerdydd a Chasnewydd bob awr rhwng 07:30 a 18:30.

Fydd na'r un arall o wasanaethau Trafnidiaeth Cymru yn weithredol yng Nghymru na'r Gororau.

Sul, 9 Hydref

Er bod disgwyl i drenau deithio fel arfer mae cwmni GWR yn rhybuddio y bydd rhai trenau yn cychwyn yn hwyrach nag arfer yn sgil effeithiau gweithredu diwydiannol yn ystod y diwrnodau blaenorol.

Fydd trenau Trafnidiaeth Cymru ddim yn gweithredu cyn 07:00 ac y mae disgwyl i wasanaethau fod yn brysurach nag arfer - yn enwedig y gwasanaethau cynharaf.