91Èȱ¬

Mae holl gemau Uwch Gynghrair Cymru wedi cael eu gohirio yn sgil y cyhoeddiad fod y wlad yn mynd i gyfnod clo arall.

Dywed Cymdeithas Bêl-droed Cymru fod holl gemau Uwch Gynghrair Cymru - y merched a'r dynion - yn ogystal â chynghreiriau JD Cymru North a South, wedi'u gohirio am gyfnod amhenodol.

Mae gemau Uwch Gynghrair Cymru - neu'r JD Cymru Premier - wedi cael eu chwarae y tu ôl i ddrysau caeedig ers i'r tymor ailddechrau ym mis Medi.

Roedd hynny am eu bod wedi derbyn statws Chwaraeon Elît gan y Grŵp Chwaraeon Cenedlaethol - sy'n cynnwys cynrychiolaeth o Chwaraeon Cymru a Llywodraeth Cymru.

Ond mae'r corff yna wedi ailystyried yn dilyn y datblygiadau diweddaraf o safbwynt y cyfnod clo newydd.

Ym mis Hydref, dywedodd rhai clybiau ym mhrif adran bêl-droed Cymru eu bod yn ofni na fyddan nhw'n gallu gorffen y tymor heb gefnogaeth ariannol ychwanegol.

Mae sawl gêm yn ddiweddar wedi cael eu gohirio yn dilyn achosion o Covid-19.

Ym mis Mai, cadarnhaodd Cymdeithas Bêl-Droed Cymru y byddai cynghreiriau Cymru o lefelau 1-4 yn gorffen yn gynnar oherwydd y pandemig.

Cei Connah gafodd eu coroni'n bencampwyr Uwch Gynghrair Cymru am y tro cyntaf yn sgil y cyhoeddiad.

Mae Cymru gyfan yn y lefel uchaf - lefel pedwar - erbyn hyn, gyda phob siop ond y rhai hanfodol ar gau, ac mae pobl yn cael eu hannog i "aros adref" i achub bywydau.

Ddydd Llun, cyhoeddodd Iechyd Cyhoeddus Cymru bod 10 marwolaeth yn rhagor yn gysylltiedig â'r feirws, a 2,563 o achosion newydd.

Mae hynny'n dod â chyfanswm y marwolaethau coronafeirws yng Nghymru i 3,125 a chyfanswm yr achosion i 125,329.