91热爆

Aston Martin yn lansio car cyntaf ffatri Sain Tathan

Aston Martin DBXAston Martin Lagonda

Mae "bwrdd yngynghorol benywaidd" wedi chwarae rhan yn natblygiad yr SUV newydd

Mae Aston Martin wedi lansio'r car cyntaf i gael ei gynhyrchu yng Nghymru, gyda'r gobaith y bydd yn hwb wedi i'r cwmni gyhoeddi colledion o 拢13.5m yn y tri mis hyd at fis Medi.

Fe roddodd Llywodraeth Cymru 拢18.8m mewn grantiau er mwyn denu'r cwmni i Fro Morgannwg.

Bydd 750 o bobl yn cael eu cyflogi yn y pen draw yn Sain Tathan, a'r model DBX newydd yw'r cerbyd cyntaf i gael ei gynhyrchu yna.

Cafodd ei lansio'n swyddogol yn gynnar bore Mercher.

Gwireddu gweledigaeth

Dywed Aston Martin mai dyma "anterth rhaglen ddatblygu helaeth".

Mae'r DBX, medd y prif weithredwr Dr Andy Palmer, yn gwireddu'r weledigaeth i "ehangu portffolio'r cwmni, ac yn nodi dechrau gwaith cynhyrchu yn ail ffatri gynhyrchu Aston Martin".

Y gobaith yw y bydd y model newydd yn apelio at gwsmeriaid sydd ddim fel arfer yn prynu ceir Aston Martin.

Aston Martin Lagonda

Gall cwsmeriaid ofyn am nodweddion ychwanegol fel golchwr anifeiliaid anwes cludadwy a chynheswr i'r cist

Mae "bwrdd ymgynghorol benywaidd" wedi chwarae rhan yn natblygiad cerbyd cyntaf y cwmni i fod 芒 phum sedd, a fydd yn costio 拢158,000.

Yn gynharach eleni, cyhoeddodd Aston Martin eu bod yn benthyg $150m (拢116.7m) i sefydlogi'i sefyllfa ariannol cyn y lansiad.

Dywedodd Dr Palmer wrth asiantaeth newyddion Reuters bod y DBX "yn fodel wirioneddol bwysig" gan fod y cwmni "i bob pwrpas yn cynnal cost ffatri gyfan heb fod yn derbyn unrhyw refeniw".

Yn gynharach ym mis Tachwedd, dywedodd Aston Martin bod gwerthiannau i werthwyr ceir wedi gostwng 16% i 1,497 o geir rhwng Gorffennaf a Medi gan fod llai o alw yn Ewrop ac Asia.

Aston Martin Lagonda

Mae gwerth cyfranddaliadau'r cwmni wedi simsanu ers cael eu cynnig ar y farchnad stoc fis Hydref y llynedd.

Roedd cymhorthdal Llywodraeth Cymru yn ddibynnol ar ddarparu swyddi, hyfforddi sgiliau ac ymchwil a datblygu.

Mae hefyd wedi rhoi gwarant 30 mlynedd i Aston Martin a fyddai'n golygu bod arian cyhoeddus yn talu rhent y safle petai'r cwmni'n gadael. Dydy gwerth y warant honno heb ei ddatgelu.

Mae Aston Martin wedi dweud yn y gorffennol mai Sain Tathan fydd "cartref trydaneiddio" y cwmni lle bydd yn cynhyrchu'r cerbydau Lagonda a RapidE newydd, ond bydd y rheiny'n cael eu cynhyrchu ar raddfa lai o lawer.

Straeon perthnasol