91Èȱ¬

Mae'r elusen Shelter Cymru yn galw am fwy o hyfforddiant i bobl sy'n delio â phobl ddigartref o ddydd i ddydd.

Yn ôl yr elusen nid yw'r rhai sy'n delio â phobl ddigartref "yn ddeall eu hanghenion" ac mae angen mwy o "hyfforddiant arnynt".

Yn ôl ymchwil diweddar yr elusen mae 345 o bobl ddigartref yng Nghymru.

Dywedodd llefarydd ar ran Llywodraeth Cymru eu bod nhw wedi buddsoddi "£117,000 i hyfforddi dros 1,100 o staff yn y maes eleni".

Daw galwadau Shelter Cymru wrth i'r Llywodraeth gyhoeddi £700,000 i helpu pobl ddigartref symud o'r stryd i lety gan gynnig cymorth hirdymor iddyn nhw fyw yn annibynnol.

Mae'r cynllun yn rhan o fuddsoddiad o £30m dros ddwy flynedd i fynd i'r afael â digartrefedd.

Ond mae Shelter Cymru yn dweud fod diffyg tosturi a chydymdeimlad yn broblem ymysg rheini sy'n delio â phobl ddigartref pob dydd.

Wrth siarad gyda 91Èȱ¬ Cymru Fyw dywedodd Heddyr Gregory o'r elusen: "Y broblem yw, ac mae'n broblem gynyddol, mae 44% o gynnydd yn y nifer o bobl sy'n cysgu ar y stryd dros y ddwy flynedd ddiwethaf. Mae'r ffigwr erbyn hyn yn 345.

"Gwnaethom adroddiad am gysgu ar y stryd. Un o'r pethau amlwg o'r ymchwil oedd bod pobl sy'n delio gyda phobl sydd ar y stryd ddim wir yn deall yr anghenion.

"Dydyn nhw heb gael yr hyfforddiant priodol. Mae gan bobl sy'n cysgu ar stryd gymhlethdodau yn eu bywydau

"Mae'r cymhlethdodau hyn angen cael eu deall ac rydym yn teimlo bod y rheini sydd allan pob dydd angen fwy o hyfforddiant i ddelio â hwy fel pobl."

Ychwanegodd fod "digon o bobl gall roi hyfforddiant yn y maes".

Mewn ymateb fe ddywedodd llefarydd ar ran Llywodraeth Cymru bod yr hyfforddiant y maen nhw wedi ei gynnig yn esbonio "sut gall profiadau plentyndod effeithio ar allu rhai wrth ofyn am gymorth wrth gael mynediad at dai".

"Rydym newydd gyhoeddi cyllid gwerth £1.34m i gefnogi gwaith sy'n cael ei wneud eisoes gyda'r digartref," meddai.

"Mae hyn yn cynnwys y cynllun Tai yn Gyntaf a gafodd ei gyhoeddi ddydd Sadwrn.

"Bwriad cynllun Tai yn Gyntaf yw cefnogi pobl sydd angen cymorth sylweddol i'w helpu i symud o'r stryd."

Dywedodd Julie James, y Gweinidog Tai a Llywodraeth Leol: "Gall Tai yn Gyntaf helpu pobl sy'n ddigartref ac sy'n aml ag anghenion cymhleth.

"Nid yw Tai yn Gyntaf yn addas i bawb sy'n ddigartref - mae dal i fod angen tai â chymorth a llety dros dro.

"Ond gall chwarae rôl bwysig iawn o ran helpu pobl, yn enwedig y rheini sydd wedi bod yn cysgu allan am gyfnod hir, i allu cynnal tenantiaeth.